(infobae) – Despues di e declaracion di situacion di desaster na Colombia, anuncia dia 10 si november ultimo pa presidente Gustavo Petro, Corte Supremo di Husticia a manifesta su solidaridad cu famianan afecta pa e awasero cu a suta e teritorio nacional, specialmente departamentonan di Choco y La Guajira, como tambe Bogota.
“Corte Supremo di Husticia ta manifesta su solidaridad cu e habitantenan di e pais cu ta afronta un situacion doloroso y alarmante debi na yobida intenso den ultimo dianan. Specialmente Colombianonan cu ta biba den e regionnan estableci pa gobierno nacional como zona di calamidad publico: Choco, La Guajira y Bogota,” e alto tribunal a expresa den un comunicado. Igualmente, e Corte tambe a rechasa e decision di Ehercito di Liberacion nacional (ELN) di realisa un paro arma indefini den e Pacifico Colombiano, cu a cuminsa dia 9 di november, y esaki a impedi traslado di ayudo humanitario pa e teritorio aki, teniendo na cuenta cu e awaseronan a afecta 85 porciento di e departamento.
“Na e tragedia climatico aki ta suma e situacion di orden publico, particularmente e declaracion di paro arma di ELN, situacion cu a laga atrapa pa tres dia caba e comunidadnan pa permanece den situacion di riesgo door di no permiti nan evacua for di e zonanan afecta y haci dificil y imposible e atencion y ayudo na e famianan,” e Corte Supremo a señala den e comunicado.
Di mesun manera, e alto tribunal a pidi e grupo guerrillero aki pa stop su incursion arma den e departamento en cuestion, considerando cu tin bastante indolencia pa e victimanan di temporada di winter.
E paro arma a keda anuncia pa e Frente di Guera Occidental Ogli Padilla di ELN, kendenan a hustifica cu e medida ta debi na varios incursion di forsanan militar den nan teritorio, pa loke a pidi habitantenan di e departamento pa atene e restriccion.
E decision di paro arma nobo di ELN na departamento di Choco a genera un rechaso total di gobierno di presidente Gustavo Petro. Hustamente, e presidente a sugeri e grupo guerrillero pa stop cualkier acto violento na e teritorio, poniendo como referencia un di e textonan di sacerdote Camilo Torres, ex-integrante di e grupo insurgente aki. “Pader Camilo Torres Restrepo a papia di ‘amor eficaz’. Amor eficaz ta stop paro arma dilanti di e crisis humanitario di hende na Choco. Lo revolucionario ta amor y solidaridad humano,” e hefe di estado a skirbi riba X.
Di su parti, alto comisionado pa paz, Otty Patiño a señala cu esaki ta un situacion absurdo, ya cu a purba di reestablece combersacionnan di paz cu e grupo arma aki na comienso di luna di november. “E cos ey di intimida hende, y menos den un situacion manera esun cu nan ta bibando, ta totalmente inadmisible,” Patiño a expresa na medionan di comunicacion.
Entre tanto, director di Unidad Nacional pa Gestion di Riesgo y Desaster (Ungrd), Carlos Carrillo tambe a reprocha e accionnan di ELN na Choco, cualificando esaki como un obstaculo flagrante pa rescata e poblacion afecta pa e ola di winter.
Sinembargo, e funcionario a reitera e compromiso di institucionnan pa duna asistencia y reestablece normalidad den e departamento.
