Diamars pasa, Corte Supremo di Husticia a relaciona formalmente e ex-Presidente Colombiano, Alvaro Uribe (2002-2010) pa e proceso cu ta sigui pa presunto fraude procesal y soborno di testigo, despues di un interogacion cu a tarda mas di shete ora.
“Ora e interogacion a conclui, e Senador Alvaro Uribe Velez a keda relaciona formalmente cu e proceso cu Sala di Instruccion di Corte Supremo di Husticia a delanta, pa e delitonan di fraude procesal y soborno en concurso homogeneo y sucesivo”, e tribunal halto a señala riba su rednan social.
Despues di e declaracion, magistradonan di Sala di Instruccion di e Corte a tuma e determinacion aki, cu mas dilanti nan por adopta otro decisionnan, cu tambe por yega na un acusacion formal.
E caso di e ex-mandatario, Senador desde 2014 pa e partido Centro Democratico, a cuminsa na 2012 ora el a demanda pa manipulacion di testigonan e Senador di iskierda Ivan Cepeda, cu na e momentonan ey tabata prepara un denuncia na Congreso den su contra pa supuesto vinculo cu paramilitar.
No obstante, e demanda a bira un boomerang, ya cu e magistrado Jose Luis Barcelo no a archiva e caso solamente, sino cu tambe a dicidi di habri un investigacion pa e ex-presidente pa supuesto manipulacion di testigo contra e Senador di iskierda.
Tocante esaki, e Presidente di Corte Supremo di Husticia a señala cu ‘ningun presion, manifestacion, o protesta publico lo influi na decision cu e magistradonan ta obliga pa tuma den ehercicio di nan funcion’.
