Corte constitucional di Colombia a ordena pa estado ofrece atencion medico pa e Venezolanonan cu ta na e pais ey, debi na e crisis cu ta afecta Venezuela.
Asina e tribunal a duna di conoce ayera despues di haci un revision di un recurso di amparo, cu un muhe Venezolano di 34 aña y otro muhe mama di un mucha homber di 2 aña, a introduci.
Natty Yeraldin Sanguino, ken a laga su 5 yiu menor di edad na Venezuela, a ser diagnostica cu cancer di cueyo uterino, el a cuminsa tratamento di radioterapia pero nan no a realisa e kimoterapia, pa cual el a introduci e apelacion na corte. Den e otro caso, di e mucha homber di dos aña tabata su mama cu a apela na corte splicando cu el a biaha pa Colombia pasobra su yiu ta padece di un hernia escrotal desde cu el a nace.
Ambos caso a ser debidamente revisa y califica como ‘excepcional” ya cu e atencion medico urgente por yega na inclui tratamento pa enfermedadnan manera cancer, ora e mediconan ta considera esaki necesario, cu e corte autorisando asina e tratamento contra cancer pa e muhe y e operacion pa e mucha menor di edad.
“E atencion integral den salud pa tur e poblacion Venezolano migrante mester ta progresivo, ya cu e lo rekeri di esfuerso compleho di estado y di e disponibilidad di recursonan suficiente cu no ta pone e sistema den riesgo,” e corte a splica despues di evalua e dos casonan.
(fuente: ElNacional/EFE)
