(infobae) -Corte Constitucional a admiti e prome demanda di inconstitucionalidad contra Ley 2381 di 2024, cu ta reforma e sistema pensional di e pais. Senador di Centro Democratico, Paloma Valencia tabata esun cu a presenta e recurso legal, argumentando cu e reforma nobo di gobierno ta contra varios articulo di Constitucion Politico.

Den un auto emiti pa e alto tribunal, magistrado Jorge Enrique Ibañez Naja a detaya cu e impugnacion ta centra den tres elemento principal di e ley. E prome cargo ta sostene cu e proceso legislativo no a respeta articulo 157 di Constitucion.

Adicionalmente, ta señala cu articulonan 93 y 84.5 di e ley no ta cumpli cu loke ta disponi den articulo 48 di Constitucion, cu ta garantisa derecho na un pension adecua. Pa senador Valencia, e reforma ta presenta problemanan cu, si e keda aproba, lo genera un debe impagable pa e generacionnan jong.

Entre e presunto iregularidadnan den tramite legislativo di e reforma, e demandante a señala cu Camara di Representante a adopta e texto aproba pa Senado sin cu tabatin un debate adecua ni un splicacion di banda di e proponente riba e diferencianan cu e ponencia di di dos debate. Ademas, Valencia a subraya cu presidente Gustavo Petro a decreta e suficiente ilustracion sin respeta e tempo rekeri y cu no a discuti e 700 propuesta cu a radica.

Otro aspecto crucial di e demanda ta e creacion di un regimen pensional special pa pueblonan indigena, comunidadnan color scur, afrocolombiano, raizal, palenquero y campesino, locual ta prohibi expresamente den Constitucion. Segun e senador, esaki ta implica cu gobierno lo defini discrecionalmente e condicionnan di hubilacion pa 41% di e poblacion Colombiano, loke por genera implicacionnan financiero y social serio.

Pa continua cu e proceso, Corte Constitucional a duna orden na secretarionan general di Senado y Congreso pa duna, den un plaso di 10 dia, tur documentacion y grabacion relativo na e proceso legislativo di dicho ley. Tambe a invita varios organismo y experto pa presenta nan opinion riba e constitucionalidad di e norma en cuestion.

Ademas, a establece un termino di 10 dia pa cualkier ciudadano cu ta desea di interveni den e proceso, y a solicita intervencion di Procuraduria General di e Nacion pa emiti su concepto riba e caso.

Finalmente, magistrado Ibáñez Najar a informa presidente Petro tocante e proceso, como tambe presidentenan di Senado y Congreso y otro funcionarionan clave, cu obhetivo di por presenta argumento den defensa di e ley.

Mester recorda cu esaki no ta e unico recurso legal cu e reforma pensional di gobierno ta enfrenta. Dia 12 di augustus, Corte Constitucional a ricibi otro demanda di inconstitucionalidad entrega pa concejal di Bogota, Marco Acosta, considerando cu e iniciativa ta presenta varios vicio di tramite.