(infobae) – Despues di a keda secuestra pa 12 dia, guerilla di ELN a laga Luis Manuel Diaz, tata di futbolista Luis Diaz, den libertad.
‘Mane’ Diaz, manera e tata di e futbolista di Liverpool ta conoci na Barrancas (La Guajira) a keda secuestra dia 28 di october pa alrededor di cinc’or di atardi pa e Frente di Guera Nort di ELN, y ta te dia 2i di november cu e comando di e guerrilla en cuestion a bin haya sa.
Tres dia despues di liberacion di Luis Manuel, Eliecer Herlinto Chamorro Acosta, alias Antonio Garcia, maximo cabesante di e grupo arma, a hustifica e secuestro, sigurando cu e structuranan di ELN mester realisa operacionnan di financiamento ya cu nan no ta dedica na narcotrafico.
“Tur structura di ELN tin orientacion di realisa operacionnan militar pa obtene finanzas, ya cu nos no ta financia nos mes for di narcotrafico, nos ta un organisacion pober manera mayoria di Colombianonan y nos no tin berguensa di esey,” e mando a skirbi riba su cuenta di X.
E comandante a sigura cu, cumpliendo cu e misionnan menciona, e frentenan di guera a ser manda pa realisa e operacionnan di finanzas menciona, pero cu e Frente di Guera Nort, cu ta opera entre departamentonan di La Guajira y Cesar, no a informa cu un di nan obhetivonan tabata e tata di Lucho Diaz.
“Cumpliendo cu e orientacion menciona, e Frentenan di Guera a manda varios comando pa realisa operacionnan di finanzas. E mando di Frente di Guera Nort no a informa e Comando Central cu entre nan obhetivonan tabatin un familiar di Luis Diaz,” Antonio Garcia a skirbi riba su red social.
Na momento cu a haya sa cu un di e obhetivonan tabata e tata di Luis Diaz y cu e tabata secuestra, Antonio Garcia a reconoce cu a comete un “eror” y a duna orden pa su liberacion. “El a haci esaki despues di ehecuta dicho operacion, pa tal motibo na momento di haya sa, e Comando Central a señala esaki como un eror y a duna orden pa su liberacion,” el a finalisa skirbiendo riba su cuenta di X.
Hustamente, a traves di un mensahe priva riba Telegram, Antonio Garcia lo a expresa na otro miembronan di ELN cu e secuestro di Mane Diaz tabata un eror. “Tabata un eror e retencion di tata di Luis Diaz realisa pa e frente di Guera Nort. Luis ta un simbolo di Colombia y como tal nos ta sintie den ELN (…) Nos ta spera cu e situacionnan operativo den e tereno por keda soluciona, esey ta e orientacion cu e mandonan tin pa agilisa e liberacion,” Garcia a bisa den e mensahe.
Pa e motibo aki, e Frente di Guera Nort a inicia e proceso di liberacion, maske esaki a bira mas largo pa complicacionnan den protocolnan y exigencianan di e guerrilla.
Potret: AP y Antonio Garcia riba X.
