(AFP) – E cartel di narcotrafico mas grandi di Colombia, conoci como Clan del Golfo, a menasa dos magistrado di tribunal di paz cu ta investiga e pio crimennan cu a sucede den e transcurso di conflicto arma, segun autoridadnan a denuncia diasabra ultimo.
Hurisdiccion Special pa Paz (JEP) a informa cu e magistradonan Alejandro Ramelli y e auxiliar Hugo Escobar a ricibi intimidacion den relacion cu e investigacion di scandal conoci como “falso positivo,” un practica militar monstruoso den cual forsa publico a asesina miles di civil y a presenta nan como rebeldenan cu a cay den combate, pa asina manipula e resultadonan den e lucha contra guerrilla di iskierda.
Segun tribunal di paz, 6.402 civil a muri bao e practica aki entre 2002 y 2008.
“Mi ta rechasa contundentemente e menasanan di Clan del Golfo pa magistradonan di JEP cu ta investigando falso positivo. E buskeda di e berdad semper ta bay ta e principio fundamental di tur proceso di paz. Si Clan del Golfo no ta compronde cu paz ta implica berdad, ta miho pa bis’e y pa nos no perde mas tempo,” presidente Gustavo Petro a skirbi riba Twitter.
E prome presidente iskierdista di Colombia a yega na poder na augustus di aña pasa cu e ambicion di elimina e conflicto arma por medio di dialogo cu tur organisacion ilegal.
Den marco di su politica “Paz Total”, gobierno a haya acercamento cu Clan del Golfo cualifica como “confuso.” Esaki ta un ehercito narco integra pa 9.000 combatiente cu ta extende su brasanan na casi 30 pais y ta trafica cerca di mita di e cocaina di Colombia.
Na maart, Petro a anuncia a reanudacion di e ofensiva contra Clan del Golfo despues cu a acusa e grupo aki di kibra un pacto di alto al fuego dia 31 di december ultimo cu atake contra e poblacion civil y forsa publico.
Fiscalia a anuncia e inicio di investigacion y a sigura cu “a tuma contacto cu e dos funcionario hudicial pa conoce e detayenan di e origen di intimidacion y orienta e acto investigativo pa permiti identifica y hudicialisa e personanan responsabel.”
