Colombia: CIDH cu yamado pa eligi fiscal general lo mas pronto posible y “sin interferencia”

(NTN24) – Comision Interamericano di Derechonan Humano (CIDH) a haci un yamado diamars ultimo pa eligi un fiscal general di Colombia “cu e mayor brevedad posible” pa evita di “debilita e sistema di husticia” y a adverti cu mester haci esaki “sin interferencia.”

Corte Supremo di Husticia (CSJ) a tene sesionnan pe eligi fiscal, pero debi na falta di acuerdo entre e magistradonan, e fiscalia general a keda bao un mandato interino for di dialuna ultimo.

Dia 12 di februari a termina e periodo di e fiscal general Francisco Barbosa, ken presidente Colombiano, Gustavo Petro a acusa di kier derok’e a traves di un investigacion tocante e donacionnan cu a haci un sindicato di trahado na su campaña.

Den un comunicado, CIDH ta insta Corte Supremo di Husticia “pa cumpli cu su deber constitucional y finalisa e proceso di seleccion di e persona titular di Fiscalia General di e Nacion, cu e mayor brevedad posible.”

Ademas, ta exorta gobierno di Petro pa “garantisa e condicionnan pa dicho proceso por culmina sin interferencia.”

E comision, parti di Organisacion di Estadonan Americano (OEA) ta afirma cu ta sigui e proceso di cerca y ta adverti cu “e falta di designacion di un persona titular lo por debilita e sistema di husticia Colombiano.”

Pa esaki, ta haci un yamado “na tur estamento di Estado pa duna prioridad na institucionalidad democratico.”

Mester señala cu Fiscalia General ta eherce e accion penal, y por lo tanto, ta desempeña un papel fundamental den e lucha contra impunidad, acceso na husticia, y preservacion di democracia y estado di derecho na Colombia, segun CIDH ta recorda.

E falta di fiscal general na e pais Latino Americano a desata algun protesta. Decenas di simpatisante di presidente di Colombia, Gustavo Petro, a subi caya siman pasa na e ciudad, den un jornada den cual e magistradonan no por a sali di Palacio di Husticia pa motibo di blokeo.

Diahuebs di siman pasa a registra “71 movilisacion social na henter e pais cu, cu excepcion di momentonan di desorden na Bogota y Medellin, a keda cataloga como pacifico” pa estado, segun CIDH a afirma.