(NTN24) – Cerca di dies mil persona a keda aisla di manera forsa na Choco debi na un “welga arma indefini” decreta pa e grupo guerrillero Ehercito di Liberacion Nacional (ELN) memey di negociacionnan di paz cu Gobierno Colombiano ta adelanta.
Segun Defensor di Pueblo, despues di anuncio di ELN na departamento di Choco, “por lo menos 9.800 persona di e municipio di Istmina, Medio San Juan, Sipí y Nóvita a keda aisla di manera indefini.”
Igualmente, e entidad a indica cu e poblacion ta wordo afecta pa e restriccion ilegal aki den materia di transporte di cuminda como tambe acceso na servicionan di salud.
A traves di un documento publica siman pasa, ELN a prohibi e mobilidad y actividadnan diario den e poblacion Colombiano aki, supuestamente debi na e asesinato di e hoben Santiago Caceres den man di “paramilitarnan” den un supuesto “convivencia” cu Forsa Publico.
“Dialuna 12 di december miembronan di Autodefensa Gaitanista di Colombia (AGC) a drenta den comunidad di Negria na Istmina, unda un persona a wordo asesina y e poblacion a ricibi menasanan y daño na bienes civil, ademas di hortamento”, Ministerio Publico a agrega.
E welga a wordo anuncia pa e frente “Omar Gomez” di guerrilla di ELN cu ta opera den e zona aki di Colombia.
Di acuerdo cu Defensor, “e hechonan aki ta desaroya den contexto di un enfrentamento entre guerrilla di ELN y AGC-Clan del Golfo cu a bira pio den ultimo dos aña”.
E situacion a genera un indignacion grandi tanto den oposicion como na Gobierno di Gustavo Petro, cu na comienso di e siman pasa a anuncia e ciere “exitoso” di e prome ciclo di combersacion di paz cu guerrilla na Caracas Venezuela despues cu a cuminsa bek e negociacionnan na november ultimo.
