Ayera diamars, e ex-presidente Colombiano Alvaro Uribe Velez a converti den e prome ex-mandatario di e pais aki pa duna un declaracion hudicial na Corte Supremo di Husticia, pa un investigacion criminal cu ta sigui den su contra pa presunto fraude procesal y compra di testigo.
Un di e resultado final posibel di e declaracion di parti di e magistrado ta cu nan lo por dicidi di acusa formalmente Uribe y tambe lo por ordena prizon preventivo.
Den caso cu e yega na huicio y wordo haya culpabel, lo por enfrenta un castigo di entre 6 pa 8 aña di prizon. Despues, e magistrado tambe lo por archiva e investigacion.
Uribe no ta solamente Senador y fundado di e partido gobernante Centro Democratico, sino cu tambe ta e politico Colombiano mas popular den ultimo siglo y mey. Su destino ta laga masha poco indiferencia: Mientras mita pais ta vener’e, e otro mita ta parce di detest’e.
E proceso ta inclui elemento controversial numeroso, como e hecho cu e mayor cantidad di testigo ta criminal convicto, algun di cual a contradeci nan mesun declaracion; y cu a uza grabacion telefonico cu ta poni den duda.
Durante e fin di siman pasa, e Uribistanan a cuminsa sali riba caya cu manifestacion na fabor di e ex-presidente na ciudad manera Medellin, Cali, Cartagena y Barranquilla.
Di otro banda, e opositornan di Uribe a resalta e poco asistencia na e marcha na fabor di e ex-mandatario y a celebra cu Corte a yama e ex-presidente pa e proceso aki, despues di mas di un aña di retraso.
