(Infobae) – E cantidad di municipio cu ta den alerta cora pa riesgo di candela forestal a aumenta ayera diabierna. Den un rapport reciente di Instituto di Hidrologia, Meteorologia y Studionan Ambiental (Ideam) a revela cu 681 zona di e pais ta permanece den alerta cora.
Di acuerdo cu Ideam, e cifra a aumenta pa e condicionnan seco loke a aumenta e probabilidad di candela di cobertura vegetal na henter teritorio nacional.
“Debi na e persistencia di condicionnan seco na e pais, e cantidad di punto di calor ta subi, como tambe e probabilidad di candela di cobertura vegetal, na unda actualmente tin alerta cora y oraño di menasa di candela den regionnan Caribe, Andino y Orinoquia principalmente,” e instituto a indica.
Segun e rapport, e departamentonan cu tin mas municipio afecta cu alerta cora pa riesgo di candela ta: Cundinamarca (112), Boyaca (100), Tolima (45), Santander y Norte de Santander (39 cada uno), Bolívar (38) y Antioquia (35).
Ademas, e rapport tambe a indica cu tin otro 198 municipio cu ta den alerta oraño cu posibilidad di candela forestal manera: Antioquia (49), Santander (34), Nariño (26) y Cauca (19).
Tambe ayera a bira conoci cu e candelanan aki ta menasa cu destrui parti di Sierra Nevada di Santa Marta. For di tres dia caba lidernan comunal di e parti halto di Cienaga, na Magdalena, tabata haci un yamado na organismonan di control pa cuminsa cu e labornan pa controla e candela.
Segun comunidad indigena cu ta cerca di e zona, te e sero di mas halto ta ser afecta pa loke nan ta manifesta nan preocupacion pa e perdida di flora, fauna y e riunan Sevilla, Frio, Tucurinca, Sherua, “tur parti di ariba ta cendi na candela,” segun e lider comunal di Palmor Apolinar Vasquez a bisa.
Forsa Aerospacial Colombiano (FAC) tabata trahando pa paga e candela na sector di Pueblo Nuevo na Sierra Nevada di Santa Marta cu e sistema Bambi Bucket.
