(EFE) – Un persona a muri y 20 a resulta herido ayera diaranson debi na caida di un cabina di Metrocable di Medellin, e red di teleferico di e ciudad, ora tabata drenta den un stacion di e sistema di transporte, den cual cerca di 250 usuario a keda trapa pa algun oranan despues di stop e operacionnan.

Departamento Administrativo di Gestion di Riesgo di Desaster (DAGRD) a haya e notificacion di e collapse di e cabina aproximadamente 4or di mainta, ora el a cay na momento cu tabata cumpli e recorido di linea K, componi pa cuatro stacion y tin un longitud di 2 kilometer y 93 cabina, cada un cu un capacidad pa 10 persona.

“Den un accidente na Metrocable di Medellin un cabina a cay drentando na stacion Popular, den cual 11 persona tabata biaha, un di nan lamentablemente a fayece na centro asistencial pa e gravedad di su heridanan” e director di DAGRD, Carlos Quintero a bisa.

E funcionario a declara cu, despues di e yegada di e prome tripulacion di bomberonan na stacion Popular, e 11 persona afecta a ser atendi, stabilisa y hiba na centronan hospitalario, entre nan un homber di 55 aña cu a fayece “debi na un golpi.”

Despues di e revision y evacuacion di otro cabinanan di e sistema, Quintero a reporta cu otro 20 persona tabata herido, dos di nan di gravedad.

Mientras, ekiponan specialisa di rescate cu tabata ariba a realisa maniobranan na lo largo di e linea di Metrocable pa evacua cerca di 250 usuario cu a keda trapa den cabinanan cu tabata colga na laira despues di a stop e operacionnan di e sistema pa via di e incidente.

Gerente di Metro di Medellin, Tomas Elejalde, a revela cu e accidente a presenta “ora un cabina cu tabata bahando di stacion Santo Domingo a stop pa drenta den otro stacion y a ser alcansa pa esun cu tabata biniendo, nan dos a dal contra otro y a presenta e caida di un di nan pa causanan cu te ainda nos ta investigando.”

El a declara cu “ta prome biaha den historia operativo di Metro, den su 29 aña di servicio, cu nos ta atendiendo un situacion lamentabel cu pasaheronan afecta,” pa lo cual mester ta “cauteloso y huicioso” cu e investigacion.