Ayera mainta (diamars) Defensa Civil, Cruz Cora Colombiano y 25 unidad di Bombero a reanuda e buskeda di e curpanan cu ainda ta atrapa bao di escombro di e brug cu a cay den otro un dia prome. E colapso di e brug den construccion den e sector di Chirajara, riba e caretera Bogotá-Villavicencio, ta laga te na e momento aki nuebe trahado morto y 8 herida.
Di acuerdo cu informacion di e organismonan di ayudo, pa banda di merdia ya a rescata tres di e cinco victimanan fatal cu ainda tabata bao di e structura benta na pia di loke tabata e brug, na casi 300 metro mas abao. E dos curpanan cu falta ainda, ta localisa bao di un structura grandi cu ta dificulta nan recuperacion.
“Nos ta sigui atento pa cualkier situacion y nos ta spera pa por termina e trabounan di rescate awe mes”, Alvaro Farfan, di e cuerpo di Bombero di Cundinamarca a bisa.
Di otro banda, autoridadnan di Hospital San Rafael na Cáqueza, unda a hiba shete di e heridonan, a informa cu Saúl Hernández, Jonhy Mauricio Gómez, Wilson López, Jorge Luis Martínez y Luis Alvarado por a bandona e hospital debi cu nan tabatin solamente heridanan menor.
Alvarado, di 23 aña, a relata cu “tur hende a cuminsa grita cu e brug tabata cayendo, mi no tabatin tempo pa nada te cu mi a sinti un golpi na mi cabes.”
Den e caso di Emiglio Bernal Rojas y Ederth Rivera, nan a ser manda, pa e gravedad di nan lesionnan, na centronan asistencial na Bogota: na Hospital la Samaritana y na Clinica Nueva, respectivamente.
Coviandes, e consorcio cu tabata ehecuta e obra pa un balor total di 3,1 biyon peso (US$ 3.000 miyon), a informa dialuna den un comunicado cu e prioridad, na e momento aki, ta brinda atencion na e famianan afecta. Na e luga ya tin experto investigando e posibel causa di e accidente.
E brug unda tabatin 160 persona trahando, tabata planea pa entrega na maart proximo. E structura tabata diseña pa un largura di 446 metro, na un altura di 286 metro.
