Colombia: Bogotanonan ta busca prestamo of credito pa por tin cuminda na cas

(Infobae) – Concejal David Saavedra a bati alarma pa e situacion economico cu Bogotanonan ta enfrenta y cu ta impedi cu nan por haya e cuminda cu nan tin mester pa nan famia.

Di acuerdo cu esaki, e funcionario publico den un debate di control politico na Secretaria di Integracion Social, ta evidencia un aumento den inseguridad di alimentacion na e capital, cu ta obedece na tres problema specifico.

E dificultad pa cumpra alimento ta debi na prome luga, na falta di placa, cu ta representa 48% di e problemanan, den di dos luga, aumento di prijs di cuminda, cu ta contribui na e situacion cu 29% y den e di tres luga, e reduccion den entrada di e personanan, cu ta coresponde na 23%.

Segun e concejal, 49% di hogarnan Bogotano tin un entrada so, loke ta nifica cu un persona di e cas ta traha y ta haya salario pa sostene su famia. Pa e mesun motibo ey hopi ciudadano mester a busca prestamo pa por cumpra cuminda. Hopi di nan ta fia placa den e negoshinan di bario y nan ta keda cu e debe, otronan ta solicita credito pa garantisa e cuminda pa famia y nan ta keda cu debe tambe, tin otronan cu ta traha den mercado informal pa por sobrevivi.

Den otro ocasion, tambe nan ta pidi cierto cantidad di placa na esnan cu ta fia placa denomina como “gota gota” cu ta prestamistanan di e bario. Di acuerdo cu Concejo di Bogota, pa hopi biaha e prestamo ta caba cu persecucion, menasa y hasta homicidio di e personanan cu a haya e debe y no por a paga back. Comerciantenan chikito y mediano tambe ta pidi e ayudo economico aki cu finalmente ta perhudica nan.

Segun revista Forbes, Central di Abasto di Bogota (Corabastos) tin un cantidad grandi di persona dedica na negoshi aki. Normalmente, nan ta pasa y ta cobra e negoshinan pa dia of pa siman segun un bendedo informal a señala.

Concejal Saavedra a splica cu na tres localidad a evidencia e indice mayor di “hamber scondi,” segun datonan di entre 2017 y 2021, e prome ta Chapinero (entre 1% y 2.6%); e di dos ta Engativa (entre 2.8% y 7.3%) y e di tres ta Suba (entre 3.2% y 9.3%).

“Hamber na Bogota ta un realidad doloroso cu ta persisti. Nos a cita Integracion BTA na un debate di control politico na Consejo di Bogota pa solicita accionnan concreto pa mitiga e problematica aki cu ta afecta 25% di e poblacion; inflacion y falta di oferta alimentario publico ta pone e situacion pio,” e funcionario a expresa.

Ademas di esaki e funcionario a revela cifranan alarmante tocante alimentacion di muchanan entre 0 y 8 aña. A registra mas di 4.089 caso di desnutricion agudo den muchanan di edadnan aki.

Segun Instituto nacional di Salud (INS) den prome 13 siman di 2024 a documenta 962 caso di desnutricion agudo den muchanan menor di 5 aña na e capital Colombiano.