(EFE) – Cu seguridad di unidadnan di Wardacosta Colombiano, ayera diabierna a yega na waf di Cartagena de Indias e barco hospital USNS Comfort di Armada di Merca, e cual a yega pa ofrece servicionan di atencion medico y formacion den temanan di asistencia humanitario.
USNS Comfort a yega na un di e waf di Sociedad Portuario di Cartagena na unda a wordo ricibi pa autoridadnan local cu a duna nan un bonbini na e tripulantenan, cu ta realisa un mision humanitario cu a denomina ‘Promesa Continuo’.
Durante e ocho dia di bishita di e barco aki e mediconan ta bay realisa atencion den medicina general pa adulto, medicina preventivo, ginecologia, pediatria, ortopedia, oftalmologia, dermatologia, odontologia y tratamento dental, distribucion di bril y educacion den salud publico, ademas di cirugia den e sala di operacion di e barco.
E mediconan ta espera cu lo por atende un promedio di 1.000 persona pa dia y realisa por lo menos 12 cirugia pa dia.
Adicionalmente nan lo desaroya jornada di asistencia veterinario, ehercicionan maritimo y terestre di atencion di emergencia y desaster cu participacion di personal militar di Merca, Armada, Defensa Civil y Ehercito Nacional di Colombia.
E mision Promesa Continuo no solamente lo beneficia e poblacion mas vulnerabel Colombiano sino tambe e migrantenan.
Esaki ta di shete biaha cu e barco hospital ta yega Colombia. Den dos ocasion anterior nan tabata na e waf di Tumaco y Buenaventura, na ocean Pacifico y un bes na ciudadnan Caribeño di Santa Marta y Turbo.
19 di november ta su fecha di salida pa por continua su biaha na Latino America, den cual tambe ta bay bishita Guatemala, Honduras, Haiti y Republica Dominicana.
