E aerolionea Colombiano Avianca diadomingo pasa a indica cu a scoge di manera boluntario pa e Capitulo 11 di e codigo di Bancarota di Merca, na e Tribunal di Bancarota di districto di New York, cu e fin di preserva y reorganisa nan negoshinan.
Avianca a resalta cu ta un medida temporal cu lo permiti completa un restructuracion financiero bao supervision di e sistema hudicial di Merca.
“Nos ta kere cu e reorganisacion bao e Capitulo 11 ta e miho caminda pa sigui proteha e servicionan esencial di biahe y transporte aereo cu nos ta proporciona na Colombia y na otro mercadonan na henter Latino America. Avianca a opera pa mas di 100 aña, birando asina e di dos aerolinea na mundo cu a logra esaki. Nos ta sigur cu door di e proceso aki nos lo continua ehecutando nos plan ‘Avianca 2021’, cu ta optimalisa nos structura di capital y nos flota di avionnan y cu apoyo gubernamental pa Sali como e miho y mas eficiente aerolinea cu lo opera pa hopi aña mas”, Anko van der Werff, presidente di Avianca Holdings a bisa.
Avianca tabatin su avionnan riba tera desde 23 di maart pasa, dia cu a cuminsa e prohibicion di vuelonan pa e Gobierno Colombiano, reduciendo nan ingreso mas di un 80%.
“Acoge nos pa e proceso aki tabata necesario debi na impacto imprevisibel di e pandemia COVID-19 cu a provoca un disminucion di 80% di e trafico mundial di pasahero”.
E aerolinea a tuma e decision di bancarota, buscando preserva e empleonan di mas di 21.000 trahado na Colombia y otro mercado internacional.
Avianca a enfatisa cu e pandemia a provoca un disminucion di e 90% di trafico mundial di pasahero, pa loke ta espera cu lo reduci e ingreso di e industria na henter mundo na 314.000 miyon dollar, tal como Asociacion di Transporte Aereo Internacional (IATA) a indica.
