Un gran conmocion a genera na Colombia un atentado contra un grupo di lider social cu tabata reuni na Santander di Quilichao, na nort di departamento di Cauca. Entre nan tabata Francia Márquez, ganadora di e Goldman Environmental Prize na 2018, considera como un premio nobel di medio ambiente. Ni un hende a muri pero dos escolta a keda herido.
Diasabra dia 4 di mei den oranan di atardi, varios defensor di derechonan humano y lider comunitario tabata desaroya un reunion den e finca La Trinidad, na Lomitas, ora varios homber a drenta arma y nan a ataca e grupo cu granada y fusil; segun e Asociación di Conseho Comunitario di e Nort di Cauca (ACONC) a denuncia na Fiscalia.
Den e suceso, dos escolta di Unidad Nacional di Proteccion (UNP), identifica como Gildardo Ramírez y Luis Alexánder Becerra a keda herido, nan tabata forma parti di e skema di siguridad di algun lidernan cu a ser menasa anteriormente. Ambos a ser traslada te hospital di Santander di Qulichao ora nan ta recupera di su lesionnan.
Márquez ta conoci pa su lucha na e teritorio di Cauca contra e menasanan paramilitar y guerrillero y aworaki e mineria ilegal. Pa via di e atake, el a sigura cu no lo bay laga su defensa pa e recursonan natural, manera el a haci desde 1983 ora hunto cu su famia y comunidad nan a evita e desviacion di e riu Ovejas pa surti un dam.
E atentado a ser rechasa pa varios organismo internacional como e fundacion Human Human Rights Watch y e area di Derechonan Humano di Organisacion di Nacionnan Uni (ONU). Asina tambe como e Defensor di Pueblo, cu a emiti trempan caba varios alerta riba e menasanan di varios di e lider aki, specialmente Francia Márquez.
