(ElTiempo) – Un atake cu explosivo contra un caravana militar a laga un saldo fatal di cinco soldad morto y dies efectivo mas herida. E suceso a tuma lugar den marduga di diamars, na e sector conoci como Palmarito, entre e municipionan Tibú y Salazar de las Palmas, na departamento Norte de Santander.
E Segundo Division di Ehercito a informa cu e atake tabata di e Frente Juan Fernando Porras Martinez di Eln, poco ora despues cu e guerrilla aki a anuncia un ‘cese al fuego’ di 9 te 13 di maart, durante e proximo eleccion legislativo.
“Nos ta rechasa e accionnan cobarde y in discrimina aki, unda Eln pa no por enfrenta e tropanan oficial, ta emplea medio y metodo di guera no convencional, prohibi expresamente pa e Derecho Internacional Humanitario, cu ta pone na riesgo bida di nos tropanan y di comunidad cu ta move den e sector ey”, asina Ehercito a señala.
E dos explosionnan a keda registra pa 1or di marduga ora cuatro truck di e task force Vulcano di e segundo division di ehercito, ora na tabata move den e zona di frontera cu Venezuela aki. E uniformadonan herida a ser evacua di e luga y ta atendi na e Clinica Medical Duarte y den e Hospital Universitario Erasmo Meoz, na Cucuta.
E soldadnan cu a fayece den e atake ta Laurentino Peña Peña, Jeisson David Peña Rico, Gabriel Alonso Pérez Caro, Egdy Fernando Pérez Ante y Jhonatan Camilo Pérez Burbano.Di su parti, e Defensoria di Pueblo (tipo di Ombudsman; red.) a rechasa e hecho y a señala cu e atake ‘ta un burla pa speransa di e Colombianonan’ y ta puntra ta kico Eln ta busca. Defensoria ta haci un yamada na tur actor arma cu ta parti di e guerrilla pa nan uni nan mes na e mesa di dialogo na Quito, Ecuador, cu muestra di paz real.
