Colombia: Alias Memo Fantasma a keda den libertad despues cu terminonan a caduca

(infobae) – E señalado narcotraficante y ex-miembro di Bloque Central Bolivar (BCB) di Autodefensanan Uni di Colombia, Guillermo Leon Acevedo Giraldo, alias Memo Fantasma, a keda den libertad ayera tardi, despues cu e termionan a caduca.

E solicitud a keda presenta diaranson den Compleho Hudicial di Paloquemao, un tercer intento di su defensa pa obtene libertad di alias Memo Fantasma. E defensa a argumenta cu ya a pasa 286 dia desde e momento cu a radica su escrito di acusacion, pero e huicio den su contra nunca a inicia y e plaso legal maximo ta di 240 dia, asina cu e acusado lo ta pasando tempo innecesario den medida di aseguramento.

E retrasonan pa inicia e huicio di e acusado aki no ta responsabilidad di su persona of su defensa, nan a argumenta, y no a sostene maniobranan di retraso pa forsa e libertad pa terminonan caduca. Al contrario, a señala cu a presenta circunstancianan fuera di nan control: solicitudnan di retraso y reprogramacion di Fiscalia General di e Nacion, problemanan di agenda di e husgado, y otro asuntonan aheno na Acevedo.

Fiscalia a argumenta su desacuerdo cu e decision pero no a presenta recurso pa apela esaki. Tampoco e delegado di Procuraduria General di e Nacion a haci esaki. “A tarda hopi digitalisando e pruebanan; e retraso no ta responsabilidad solamente di e defensa sino tambe di e Fiscalia”, e funcionario di Ministerio Publico a declara.

Acevedo tabata un di e narcotraficantenan mas poderoso di e pais. Su bida criminal a cuminsa den temponan di Pablo Escobar y e cartel di Medellin. Memo Fantasma a pasa desapercibido pa mas di 30 aña pa autoridadnan Colombiano. El a converti den un ‘homber di negoshi’ kende a biba algun tempo na Spaña despues di su captura.

Ta investigando Memo Fantasma pa supuestamente laba 54mil miyon pesos di BCB di AUC, structura lidera pa Carlos Mario Jimenez, alias Macaco, kende desmobilisa na 2007. Memo Fantasma, señala pa alrededor di 15mil morto atribui na e autodefensa, no a participa den e desmobilisacion y lo a continua labando activo den clandestinidad.

E proceso hudicial contra Memo Fantasma ta larog y di tur manera, e homber liber ainda lo ta vincula na e investigacion pa delito di concierto pa comete delincuencia, enrikecemento ilicito, y lavamento di activo.