Alcalde eligi di Bogota, Claudia Lopez, ayera a bisa durante su prome presentacion cu prensa cu e gobernantenan mester compronde e malestar y necesidadnan di e sociedad y traha pa ofrece solucion y supera e desigualdad.
“Nos tin cu preocupa pa compronde cua ta e malestar social cu tin patras y pa atende” e necesidadnan ey, el a bisa contestando riba su opinion di e protestanan di ultimo siman na Bogota y otro ciudad di Colombia den distinto sector social.
E alcalde eligi, di partido Alianza Verde, ayera dialuna a ofrece su prome conferencia di prensa despues di e victoria historico den eleccionnan di diadomingo pasa, cu a converti den e prome muhe cu ta yega na e poder di e capital Colombiano pa via di eleccionnan, ya cu te awor Bogota tabatin alcalde nombra internamente so.
Como alcalde, el a comenta cu, “Latino America henter ta demostra nos awe cu no ta cu forsa, cu no ta Esmad (Escuadron Mobil Antidisturbio di Polis), cu no ta cu golpinan e manera di supera e desigualdad profundo, inequidad y inhusticia cu tin den nos ciudadnan y den nos paisnan”.
Desde varios luna, e problemanan social ta motiva Colombia cu manifestacionnan constante di maestro, universitarionan y sindicalistanan cu ta reclama mas inversion social y menos represion, pero sin alcansa e magnitud of vandalismo cu a mira na otro paisnan Sur Americano recientemente, como Ecuador of Chile.
