(EFE) – Alcalde de Medellin, Federico Gutierrez, dialuna ultimo a anuncia “medidanan extraordinario” pa preveni y mitiga explotacion sexual di mucha cu e firma di dos decreto pa suspende pa un tempo di seis luna “e demanda of solicitud di servicionan sexual y actividadnan similar.”
“For di awe y pa un termino di seis luna ta suspende temporalmente e demanda of solicitud di servicionan sexual y actividadnan similar na espacionan publico den e area identifica den e decreto aki,” Gutierrez a declara den un conferencia di prensa.
E mandatario a declara cu e medida aplica ta specificamente pa luganan manera Parque El Poblado y Parque Lleras y otro areanan rond, ademas di Provenza, sector popular pa su barnan y restaurant, cu a duna nomber na un cantica di Karol G y a haya reconocemento na 2022 como un di e cayanan “mas cool” na mundo pa revista Time Out.
Gutierrez a denuncia cu ta existi un red di trata di personanan y a splica cu a tuma e medidanan aki “pa accionnan” di structuranan criminal na e luga y e “problema social” cu ta presentando den sector turistico aki di Medellin.
Ademas, secretario di seguridad di Medellin, Manuel Villa, a splica cu e enfoke di e decreto ta di “persigui” esnan cu ta solicita servicionan sexual, na esnan cu ta facilita e servicionan of na ken ta tolera e servicionan sexual aki.
“Eynan ta e proxeneta, e nacional of stranhero cu ta bay tras di e personanan cu ta presta servicionan sexual y establecimentonan cu ta tolera of facilita e fenomenonan aki,” Villa a sostene.
Di su parti, secretaria di hende muhe di Medellin, Valeria Molina a recorda cu “na Colombia no ta ilegal pa ta prostituta” pero si a reconoce cu un “muhe den contexto di prostitucion ta un muhe vulnerabel, cu ta den riesgo di violencia y den riesgo di morto tur momento.”
“Nos kier saca nan di e vulnerabilidad ey pa nan por haya oportunidadnan den nan bida,” el a bisa.
Mientras tanto, implementacion di un plan piloto di un luna pa modifica e orarionan di funcionamento di restaurantnan, barnan y discoteca na Parque Lleras y areanan rond di dje ta otro medida implementa pa Alcaldia di Medellin.
A haci e anuncio di e decretonan aki debi cu diahuebs di siman pasa a haya un turista Mericano di nomber Timothy Alan Livingston na hotel Ghotam na Provenza cu dos mucha muhe, di 12 y 13 aña, pa presuntamente abusa di nan sexualmente, segun autoridadnan a reporta.
E mesun alcalde a revela cu e Mericano di 36 aña, ken a yega Medellin durante Semana Santa den un vuelo for di Fort Lauderdale, a sali di e pais un dia despues cu a ser haya cu e dos mucha, loke ta nifica cu no por a ser procesa pa ningun delito, pero no ta descarta su extradicion un bes e investigacion lo continua.
