Mientras tabata realisa un espectaculo aereo na e ciere di Feria de las Flores na Medellin, dos sub-oficial di e Forsa Aereo a perde nan bida den un suceso cu awo ta bou investigacion.
E hecho a tuma luga despues di 3or di atardi, ora a cuminsa e Desfile di Silleteros, durante e cual dos militar tabata colga di un helicopter y nan tabata sostene un bandera. Dos persona tabata haci esey cu un bandera di Colombia y otro dos cu e bandera di Antioquia.
E dos aeronave a pasa riba di e hende cu tabata desfila y tambe algun persona na avenida 33.
Segun informacion di e Forsa Aereo di Colombia (FAC), e victimanan mortal a ser identifica como e sub-oficial Tecnico Sub-hefe Jesús Mosquera y Tecnico Cuarto Sebastián Gamboa Ricaurte, kendenan tabata pertenece na e specialidad di Siguridad y Defensa di Base Aereo, integrante di e Comando Special Aereo number 5 di Rionegro, Antioquia.
Di acuerdo cu e Vocero di e aeropuerto Olaya Herrera, di Medellin, mientras un di e aeronave lo bay aterisa, e militarnan cu tabata sostene e bandera di Colombia a cay for di aire riba e pista di aeropuerto y nan a perde nan bida.
Den un comunicado, e institucion a lamenta e suceso y a manda condolencia pa nan famia, tambe a sigura cu ‘e motibo di e accidente doloroso aki ta den un investigacion di banda di e institucion’.
