(NTN24) – Autoridadnan Colombiano ta buscando e personanan responsabel di e asesinatonan registra na Bogota, capital di Colombia, den ultimo dianan. Dialuna ultimo, 5 di september, a bira conoci un otro caso cu a causa teror entre e ciudadanonan: a haya curpanan mutila den saconan preto di desperdicio na localidadnan di Engativa y Suba.
E hechonan a registra band’i 3or di marduga, di acuerdo cu informacion cu Polis a entrega, trahadonan di e compania di desperdicio a haya saconan den e baki di sushi cu resto di cadaver na e bario Bochica (Engativa); e di tres curpa a wordo haya den condicionnan similar na Suba.
Oranan despues comandante di Polis di Bogota, Carlos Fernando Triana a entrega mas detaye di loke a sucede.
“Nos a wordo informa den oranan di marduga cu na sector Engativa a haya tres saco cu diferente partinan di curpa humano. A cuminsa un trabou pa determina e circunstancianan di esaki, informacion suministra pa trahadonan di compania di sushi ta cu nan a haya den interior di un baki utilisa pa tira sushi e tres saco aki y asina nos a cuminsa e trabou pa determina kico a pasa realmente”, el a bisa.
Door di e preocupacion di e Bogotanonan, Trianan a señala cu autoridadnan ta verifica e camaranan di e sector pa ubica esun responsabel. Ademas, a indica cu a activa tur e capacidad di Polis den coordinacion cu miembronan di Fiscalia General di Nacion pa determina e circunstancianan di e caso nobo aki di violencia cu ta asota e ciudad.
Cu e caso aki ya caba tin mas di 19 e crimen similar cu a wordo registra den aña aki na capital Colombiano segun loke e mesun autoridadnan a bisa.
