Por lo menos 70 ciudadano stranhero a wordo rechasa na Colombia desde 1 di october ultimo te e fecha pa no cumpli cu protocolnan di bio-siguridad adopta pa e pandemia di coronavirus, dialuna autoridadnan di migracion a informa.
“Nos a rechasa mas di 70 stranhero cu no a yega cu un test PCR negativo,otronan cu a yega sin e PCR mes y esey a hiba nos pa rechasa nan”, director general di Migracion Colombia, Juan Francisco Espinosa a declara riba rednan social.
E anuncio a wordo haci despues di e deteccion di dos caso nobo di Covid-19, un muhe y su baby, ken a yega na Colombia diadomingo den oranan di anochi for di Cancun, Mexico.
E funcionario a haci un “yamada special di atencion pa cu e personanan aki lo no expone nan salud y e salud di otro hende” ora el a recorda cu “subi na un avion cu Covid-19 no ta permiti bou e regulacion presente di migracion Colombia y Ministerio di Salud”.
Desde 1 di october ultimo, ora a cuminsa exigi e test PCR pa drenta Colombia, a yega na e pais cerca di 9.000 ciudadano nacional y stranhero via aereo.
Segun e hefe di autoridad di migracion Colombiano, ta necesario cu biaheronan lo compronde e responsabilidad cu tin pa sociedad y ainda mas den un situacion di emergencia sanitario manera esun cu e mundo ta atravesa aworaki.
Ora el a referi pa aerolineanan cu a transporta e cinco caso positivo pa coronavirus, Espinosa a bisa cu a cuminsa un investigacion administrativo, e cual por hiba te un sancion di 12 miyon peso (3.134 dollar) pa cada un di e biahero cu no ta cumpli cu e norma.
Gobierno Colombiano a autorisa e reapertura gradual di vuelonan internacional desde 21 di september, despues di un suspension di casi seis luna debi na restriccionnan imponi pa e pandemia.
Ministerio di Colombia a informa ayera cu e total di casonan na e pais ta yega na 862.158, mientras cu e mortonan ta di 26.844.
