(Infobae/TierraColombiana) – Casi un kinto parti di e glaciarnan di Colombia a desaparece den ultimo shete añanan, debi na cambio climatico extremo, asina autoridadnan local a informa diahuebs pasa.
E superficie di e seis glaciarnan di e pais a pasa di un total di 45 kilometer cuadra na 2010, pa 37 na 2017 (-18%), pa evento extremo asocia cu fenomeno natural y e cambio climatico,” asina e Instituto di Hidrologia, Meteorologia, y Estudio Ambiental (IDEAN) a informa den un comunicado.
Si e ritmo aki sigui, e sneeuw di Santa Isabel, na e cordillera central di Colombia, lo por desaparece den e proximo 10 aña, e director di e organismo Omar Franco a bisa na un conferencia di prensa.
Di su parti e ministro di Medio Ambiente, Luis Miguel Murillo, a afirma cu “e implicacion di e calentamento global ta enorme pa e pais” y un di su consecuencianan lo por resulta e perdida di 30% di e biodiversidad natural.
Den ultimo 2 aña, a desaparece 5.8% di e masa di e glaciarnan di e pais, cu ta reparti den dos sierra nevada grandi: esun di Cocuy y di Santa Marta (noreste) y cuatro volcan, e Nevado del Ruiz, Santa Isabel, Tolima y Huila (centro).
“Nos ta haci un yamada na e paisnan cu ta gran emisor di Gas di Efecto Invernadero (GEI) pa cumpli cu nan compromisonan. Nos ta emiti 0.46% so di e GEI, y ainda ta genera e impacto aki na e pais”, Murillo a adverti.
E disminucion di e masa glaciar na Colombia, segundo pais cu mayor diversidad di mundo – despues di Brasil- ta coincidi cu e tendencia global, di acuerdo cu Servicio Mundial di Monitoreo Glaciar.
