(NTN24) – Forsanan Militar di Colombia a anuncia ayera cu nan ta avansa cu e labornan di buskeda di e cuatro mucha cu a disparce durante un accidente aereo entre e departamentonan di Guaviare y Caqueta.
Di acuerdo cu e ultimo rapportnan, ta mas di 100 soldaat cu ta den e mision humanitario aki denomina “Operacion Esperanza.” Ademas a sigura “cu a haya fingerprint cerca un riu cu por ta di e menornan desaparecido” den e selva Colombiano.
E muchanan indigena a disparce dia 1 di mei ora e aeronave den cual nan tabata biaha a cay na e zona di Amazonia, lagando atras tres victima fatal, incluyendo e piloto y e mama di e muchanan.
Apoya cu speakernan cu ta pone un grabacion di e wela di e menornan, Forsanan Special ta desplega den un espacio no mayor na 3 kilometer y nan ta dirigi na Serrania di Chiribiquete, luga na unda ta pensa cu e muchanan por ta canando.
Pa loke ta trata e restonan mortal di e tres adulto, Aeronautico Civil a indica cu a rescata nan diahuebs ultimo 18 di mei.
Diaranson ultimo, presidente Gustavo Petro a anuncia riba Twitter cu a rescata e cuatro ruman cu bida, pero despues a elimina e mensahe a rectifica cu e version ey tabata informacion falso, “mi ta lamenta loke a pasa.”
Petro a basa su declaracion di Instituto Colombiano di Bienestar Familiar (ICBF) encarga di salvaguardia e derechonan di muchanan na Colombia, ken den un comunicado a sigura cu “informacion cu ta bin di teritorio ta sigura contacto cu e muchanan, nan ta na bida y cu bon estado di salud,” Lo cual despues a resulta di no ta berdad.
Dos dia pasa funcionarionan a informa cu danki na Ulises, un cacho di Forsa Special, nan a logra di haya un refugio improvisa y elementonan cu ta duna señalnan di e muchanan desaparecido despues di e accidente aereo.
