(EFE) – Procuraduria General di Colombia a habri un investigacion contra e minister di Mina y Energia, Irene Velez, pa presunto uso iregular di su funcion pa presiona un agente di migracion cu e fin di permiti e salida di e pais na su yiu menor di edad sin cumpli cu tur rekisito legal.
Segun Procuraduria (Ministerio Publico), Sala di Instruccion Disciplinario ta bay investiga si e minister a persuadi e agente di Migracion Colombia na januari ultimo cu e fin di laga su yiu menor di edad sali for di e pais “sin dispone di e documento cu pa e situacion aki e ley ta exigi,” y cu ta consisti di un permiso notaria.
“E apertura di un investigacion tin como obhetivo haya e pruebanan cu ta bay permiti delimita e hechonan cu a pone den conocemento medionan di comunicacion local y balora nan cu un posibel repercusion di tipo disciplinario, pa loke a solicita e practica di varios prueba,” Procuraduria a señala den un comunicado.
Ministerio Publico a habri caba un investigacion contra William Lopez, funcionario implica, pa supuestamente permiti cu e menor por a biaha for di Cali pa Europa.
Segun medionan local, e minister cu tabata afo di Colombia, supuestamente a yama Lopez pa laga sali e menor sin cumpli cu e rekisitonan y ta parce cu tambe a manda un e-mail den cual a compromete su mes pa manda e documentonan despues.
E hecho a sucede na januari, ora e minister tabata participa na e Foro Economico Mundial di Davos y su casa a purba di biaha cu e menor pa Suisa, pero funcionarionan di Migracion Colombia a nenga e biahe pa e mucha debi na falta di documentacion pertinente.
Supuestamente e minister a haci uso iregular di su funcion pa presiona y laga su yiu biaha. Ta p’esey cu Ministerio Publico ta bay investiga su actuacion.
