Cuerponan di seguridad a indica cu diadomingo pasa nan a haya un artefacto, similar na esun usa siman pasa na Bogota, na un caminda di e aldea La Gaitana, di municipio Cubara, na Boyaca.
A haya 120 kilo di explosivo, 70 di pentolita y cerca di 50 di anfo, segun comandante di e di 18 Brigada di Ehercito, coronel Jorge Luis Agudelo, a conta periodistanan. Segun coronel Agudelo, e poder di e carga instala ta similar na e 80 kilo di pentolita cu ELN a usa siman pasa diahuebs na Bogota.
Ta supone cu ta trata di otro intento di e grupo guerrillero ELN, cu tabata responsable, segun gobierno, pa e atake riba e scol di polis na Bogota, cu a costa bida di 20 cadete di polis. E sitio unda Eln tabatin planea pa ehecuta e atentado ta unda diariamente ta pasa como 3.000 persona, entre habitante, turista, militar y polis.
Ta indica tambe cu den e area aki tin e vehiculonan blinda di e Grupo di Cabayeria Mecanisa No.18 di ehercito, den cual ta patruya. “Nos a logra desactiva e explosivonan ey, cu si nan a explota, lo a destrui tur cos, un tragedia cu definitivamente nos por a evita danki na trabao rapido di nos hendenan,” e coronel a detaya. A logra haya e explosivonan pa banda di 08.30 ora local, net ora e habitantenan tabata prepara pa un marcha contra terorismo di ELN.
Diadomingo pasa tabatin den henter e pais demostracion di protesta contra e actonan violento di ELN, despues di e atake riba e scol di polis na Bogota, encabesa pa presidente Duque.
