(EFE) – Presidente di Colombia, Gustavo Petro y vice-presidente Francia Marquez, diamars ultimo a establece na Congreso e proyecto di ley pa crea Ministerio di Igualdad, un di e promesa principal di nan campaña electoral cu ta bay keda den man di e vice-presidente.
E proposicion aki ta debolbe “igualdad na tur e Colombianonan pa logra cu dignidad lo bira custumber”, Marquez a bisa, tambe a señala cu mester “transforma e institucionalidad di Estado Colombiano, cu no a garantisa e derechonan di tur ciudadano, di tur e nacion, pero cu ta un principio di nos programa di Gobierno”.
Esaki ta e prome paso pa pone den marcha e ministerio nobo, ya cu na Colombia ta necesario cu e creacion di un cartera nobo lo wordo debati y aproba den e dos camara, un proceso cu por tarda lunanan, manera a pasa cu esun di Deporte, e mas reciente na juli di 2019.
“Awe ta un dia hopi special, pa hopi un dia historico, un dia cu Estado ta habri su portanan pa forma parti di esnan cu a wordo exclui y margina” e vice-presidente a agrega. E ta prome muhe di color scur cu a haya e funcion ey, pa asina insisti cu “igualdad ta un principio cu ta abarca y haci impulso di nos Gobierno”.
Den e Salon Constitucion di Congreso, Petro y Marquez a wordo acompaña pa minister di Interior Alfonso Prada, presidente di Camara di Representantenan David Racero y di Senado, Roy Barreras, ken nan a confia cu por aproba e proyecto aki pronto.
Di su parti, Petro a señala cu falta di igualdad ta “e principal problema di Colombia” y cu tin cu wordo defendi den tur ambito, pa loke el a defende e reforma tributario presenta pa su Administracion.
“Un contesta na e crisis economico? Igualdad y mas igualdad, un contesta na violencia? Igualdad y mas igualdad”, Petro a bisa.
