(NTN24) – Polis Nacional di Colombia a informa cu a captura Enrique Bautista Reatiga, alias ‘Poporro’, coordinador principal di trafico di migrante for di Colombia pa Merca.
E ta acusa di ta socio di cartelnan Mexicano ‘Jalisco Nueva Generacion’ y ‘Tijuana’, di dinamisa e microtrafico na e departamento Colombiano di Santander, y di ta autor intelectual di mas di 15 homicidio.
E aresto di ‘Poporro’ a sucede den coordinacion cu Forsanan Special di Reino Uni, Secretaria di Marina Mexicano, Fiscalia General di Estado di Quintana Roo, y Instituto Nacional di Migracion Mexicano den un apartamento exclusivo na Cancun, segun autoridadnan Colombiano a indica.
A ehecuta e operativo diadomingo ultimo pa 5:15am despues di un operacion largo cu a cuminsa prepara na maart di 2023, ora Departamento di Polis di Santander a identifica ‘Poporro’ como e ‘Otoniel’ di e region aki.
“Exito di ‘Operacion Exodo’ ta resultado di un cooperacion internacional fluido contra crimen organisa,” director general di polis Colombiano, general William Rene Salamanca Ramirez, a señala.
Despues di ubica y deten’e na Mexico, a expulsa ‘Poporro’ pa Colombia durante e mesun anochi y ora el a yega aeropuerto internacional El Dorado di Bogota, a bira efectivo e orden di captura den su contra.
Segun registronan criminal di autoridadnan Colombiano, ‘Poporro’, nativo di Santander, a inicia su actividadnan criminal na 2006 como miembro di un grupo arma organisa.
Sinembargo, despues di dos aña di actividad criminal el a dicidi di crea su propio organisacion, ‘Los del Sur’, dedica na actividadnan di microtrafico, extorsion y sicariato.
Ademas a incursiona den trafico internacional di cocaina como proveedor y socio di e cartelnan Mexicao.
Pa aña 2020, despues di un guera cu alias ‘Pichi’ pa control teritorial di trafico di droga den departamentonan di Santander y Norte de Santander, el a busca refugio na Cancun.
For di e ciudad turistico Mexicano, ‘Poporro’ a cuminsa lidera un red internacional di traficacion di migrante cu tabata yega Colombia for di Venezuela, Peru, Chile, Ecuador y Panama.
Pa accede na e hendenan e tabata tuma contacto via un decena di cuenta di WhatsApp, den nomber di ‘Don Antonio’, for di cual tabata ofrece pa hiba nan frontera di Merca pa prijsnan entre 5mil y 8mil dollar, segun polis Colombiano.
