(AFP) – Ayera diabierna, Alvaro Uribe a bira e prome ex-presidente di Colombia cu ta enfrenta un huicio penal, cu e prome audiencia di un caso den cual e ta acusa di soborna testigonan pa warda silencio riba su presunto relacion cu paramilitarnan.

For di su cas na Antioquia, e ex-presidente (2002-2010) a defende su inocencia y a bisa cu ta victima di un complot.

“Mi ta ripiti na mi compatriotanan cu hamas mi a gaña husticia,” el a bisa na medionan prome cu a asisti na e audiencia virtual.

Na comienso di e huicio, e hues Sandra Heredia a bisa cu a ricibi un escrito den cual Fiscalia ta acusa Uribe di pone den marcha un plan pa influi den testimonionan hudicial di integrantenan di escuadron di ultra-derecha cu a comete centenares di masacre na final di siglo XX.

Aunke e documento di Fiscalia no a ser publica te ainda, partinan cu a leak pa prensa ta mustra con e ex-presidente a usa emisarionan pa “entrega y/of priminti placa” na paramilitarnan preso a cambio di “manipula” nan version riba e supuesto relacion di e politico cu e gruponan arma aki.

Tabata di spera cu e fiscal di e caso, Gilberto Villareal, lo a lesa e documento completo y presenta e pruebanan ayera diabierna.

Den e audiencia, e ex-casa di un di e paramilitarnan involucra a denuncia “siguimento” y “menasanan” den su contra. E defensa di Uribe a rechasa e señalamento ey.

Considera como un di e politiconan mas influyente di Colombia, Uribe di 71 aña, ta exponi na un castigo di entre seis pa diesdos aña di prison pa un denuncia cu hudicialmente el a cuminsa, pero despues a bira den su contra.

Na 2012, Uribe cu tabata fungi como senador e tempo ey, a presenta un denuncia contra e congresista di iskierda Ivan Cepeda, na ken a acusa di busca testimonionan falso pa vincule cu paramilitarnan cu a tene un guera contra guerrilla di iskierda entre añanan 1990 y cuminsamento di 2000.

Pero Corte Supremo no solamente a abstene di hiba Cepeda na huicio, sino cu na 2018 a cuminsa investiga e ex-presidente pa sospecho cu Uribe ta esun cu a purba di manipula e testigonan.

Na augustus di 2020 e magistradonan a ordena e aresto domiciliario di e ex-mandatario, argumentando cu den libertad por stroba e investigacion.

Despues Uribe a renuncia na Senado y su file a pasa na un tribunal ordinario, e cual a saca un orden di detencion y a cuminsa e proceso back.

Na november 2023, Uribe a testifica na Fiscalia den un investigacion preliminar pa supuesto conocemento anticipa di un masacre y e asesinato di un defensor di derechonan humano, debi na e testimonio di ex-hefe paramilitar Salvatore Mancuso.

Tambe a ser denuncia na un tribunal Argentino pa presunto responsabilidad den mas di 6.000 ehecucion y desaparicion forsa di civilnan cometi entre 2002 y 2008, durante su gobierno, un caso conoci como “falso positivo”, husticia di e pais ey no a duna informacion di e caso aki.