(AFP) – Dialuna ultimo Gobierno di Colombia a otorga un di e condecoracion maximo di e pais na militarnan, indigenanan y funcionario cu a participa den operacion exitoso pa rescata cuatro mucha cu a perde den e selva durante 40 dia.
Presidente Gustavo Petro a entrega e medayanan di orden di Boyaca—e di dos distincion mas importante pa militarnan y e prome pa hende civil—na uniformadonan, aborigen bisti cu pañanan colorido y e mama di Wilson, e cacho cu te ainda ta perdi den selva Amazonico.
Den cas presidencial, e mandatario a elogia e trabou conhunto entre Forsa Arma y comunidadnan indigena cu a haya e muchanan dia 9 di juni ultimo despues di un accidente di avion dia 1 di mei den cual e mama di nan y otro dos adulto a muri.
E aeronave den cual e muchanan tabata biaha a cay entre palonan na un zona aparta di e departamento di Caqueta.
Pero Lesly (13 aña), Soleiny (9 aña), Tien Noriel (5 aña) y Cristin (1 aña) a sobrevivi na e impacto y a cana cu e guia y conocemento “ancestral” di indigenanan, Petro a bisa.
E presidente a asumi e hallazgo como un victoria di su gobierno. Durante e rescate miembronan di Ehercito, Forsa Arma y Forsa Aereo a usa helicopternan, satelite y speaker cu un grabacion di e wela di e muchanan, entre otro practica.
Di su parti, indigenanan a sigura cu nan a conecta cu “mama Tera” danki na un bebida tradicional cu propiedadnan alucinogeno cu a orienta e buskeda.
“Mi ta gradici na boso e trabou grandi cu boso a haci conhuntamente, siñando na tur Colombia con di manera uni, nos por haya bida, cu for di unidad, diversidad, e bida por ta di Colombia,” Petro a agrega.
