Enfrentamento fuerte entre e grupo Venezolano cu a purba drenta cu e ayudo humanitario cu tabata deposita na Cucuta, cerca di frontera cu Venezuela, cu centenares di herido y por lo menos 14 morto, y tambe tres truck cu cuminda y medicamento kima pa paramilitarnan Venezolano, a haci cu autoridadnan Colombiano a cera frontera pa dos dia pa por evalua e situacion.
Director general di Migracion Colombia, Christian Krüger Sarmiento, a anuncia diasabra pasa e ciere di tur paso di frontera cu Venezuela den departamento Norte de Santander pa por evalua e daño causa den e confrontacion na banda Venezolano. E ciere ta efectivo te mey anochi di awe dialuna.
E puntonan unda lo restringi paso ta e brugnan internacional Simon Bolivar, Francisco de Paula Santander, La Union y La Unidad.
Mientras tanto e cifra di persona herida mortalmente na Santa Elena de Uairen, estado Bolivar, na frontera cu Brasil, a subi caba te 15, cu mas di 100 persona cu herida di bala, segun e parlamentario Americo de Grazia. E director di e ONG Foro Penal, Alfredo Romero, a confirma cu dos ambulance cu tabata transporta supuesto morto y herido, a crusa diasabra frontera entre Brasil y Venezuela, unda na banda Brasileño tin dos pickup cu ayudo humanitario pa e pais, despues di e ciere ordena pa regimen di Nicolas Maduro diahuebs pasa.
