(El Espectador) – Full spanta a drumi e habitantenan di e bario Sierra Morena, na localidad di Ciudad Bolivar, despues di 7or di mainta di diasabra ultimo 5 di maart, a rementa un maleta bomba dilanti di warda di Polis di e sector.
Di acuerdo cu un rapport di Defensa Civil y Polis Metropolitano di Bogota, te ainda no a confirma victimanan fatal of personanan herido. Sinembargo, e viviendanan di e zona si a sufri dañonan den nan infrastructura debi na e fuerte explosion.
Den hipotesis cu nan ta maneha ta destaca cu por trata di un supuesto atentado contra Polis, un version cu e general Eliecer Camacho Jimenez, comandante di Polis Metropolitano a señala:
“Un di e prome hipotesis cu tin mas forsa ta e participacion di gruponan terorista como ELN, tumando na cuenta e menasa cu nan a bin realisando contra e evento electoral, principalmente na tur e pais”, e comandante a afirma.
Di su parti, e presidente Ivan Duque despues cu a conoce e hecho a skirbi riba su cuenta di Twitter cu a ordena aumenta e presencia di funcionarionan riba cayanan pa brinda seguridad ciudadano.
Igualmente, minister di Defensa, Diego Molano a notifica cu lo aumenta e medidanan di seguridad na ciudad, tumando na cuenta cu eleccionnan di 13 di maart ta cerca pa asina ey eligi congresistanan y representantenan di camara.
Tambe ta importante pa menciona cu for di Polis Metropolitano di Bogota ta ofrece un recompensa di hasta 200 miyon peso pa esunnan cu por duna informacion cu lo hiba na identificacion y captura di e actor intelectual of material di e explosion na Sierra Morena.
