(EFE) – Gobierno di Colombia a activa su protocolnan pa facilita salida di 68 di su ciudadanonan cu ta na Ukrania despues di e invasion di trupanan Rusiano na e pais aki pa orden di presidente Vladimir Putin.
E presidente Colombiano, Ivan Duque a sigura den un declaracion cu Canciyeria cu a papia caba cu autoridadnan di Polonia y Rumania, awe diahuebs lo papia cu Hungria y Slovakia pa facilita e salida di e ciudadanonan.
“A ser identifica 68 persona di ciudadania Colombiano y 28 stranhero cu ta haci parti di e circulo of nucleo familiar di e personanan aki. A bin papia cu varios pais y den coordinacion cu nos Canciyer pa facilita e salida di teritorio Ucraniano di nos compatriota”, e mandatario a bisa den un declaracion.
Duque a detaya cu su gobierno tin “combersacionnan hopi adelanta y un coordinacion cu Polonia y cu Rumania pa duna mas opcionnan na Colombianonan pa sali di teritorio Ucraniano”.
“Nos kier destaca cu a ser activa un protocol di coordinacion hopi halto di nos embahadanan na Europa pa atende cualkier situacion cu nos compatriota lo rekeri den teritorio Ucraniano”, Duque a splica.
Durante oranan di marduga di ayera diahuebs, trupanan Rusiano a invadi Ucrania cu apoyo di tankinan y bombanan, pa orden di Putin.
Den sentido ey, Duque a sigura cu “Colombia ta rechasa di manera categorico e guera y ta uni na tur voz di comunidad internacional cu awe ta pidi pa un retiro lihe di trupanan di Rusia di teritorio Uckraniano”.
