(Infobae) – 71% di e Colombianonan entrevista ta pensa cu vacuna contra Covid-19 mester ta obligatorio. Den e mas reciente encuesta di e firma Invamer, mayoria di e encuestadonan a apoya aplicacion obligatorio di e vacuna, despues di e resistencia di e poblacion cu no a tuma e vacuna.
Unicamente 27,8 % a duna un respuesta negativo, y 0,9% a manifesta cu nan “no sa, no ta responde”.
Di acuerdo cu e resultadonan di e encuesta di Invamer, realiza pa medionan di comunicacion BLU Radio y Noticias Caracol, den tur region unda a haci e encuesta, e resultadonan a surpasa 60% di e opcion di respuesta cu ta señala cu e aplicacion di e vacuna mester ta obligatorio.
Den e encuesta e region cafetero a mustra cu e zona aki ta esun mas di acuerdo cu vacunacion obligatorio, pues 79,8% a indica nan apoyo y solamente 19,8% a bisa di no ta na fabor. Capital Bogota a ocupa e segundo lugar registrando un apoyo di 74,5%, contra 25,5% negativo, y na tercer lugar centro oriental di e pais cu 71,7% apoyando obligatoriedad, contra 27,1% na fabor di ‘no’.
Encuanto estado di vacunacion na e pais, 52,8% a bisa cu nan ta vacuna caba, contra 35% cu tin intencion di hacie ainda y 10,6% cu a manifesta cu nan no kier vacuna.
Entre e personanan cu a bisa cu nan no ta vacuna, e motibonan tras di esey ta: Temor pa efecto secundario (41,1%); poco confianza pa via di poco ensayo clinico haci (37.5%); no ta kere den Covid-19 (4,9%); no gusta inyeccion (4,8%); y miedo di muri (4,1%).
69,7% ta apoya exigencia di carnet di vacunacion pa drenta lugarnan publico, manera stadion, restaurant y establecimento comercial. Tambe 38,4% di encuestado ta informa di e pandemia y vacunacion via rednan social, 38,1% via medionan di comunicacion y solamente 19,1% via un medico o profesional di salud.
