Te dialuna nochi pasa, Migracion Colombia a registra 326 militar di forsnan arma Venezolano cu a deserta y a huy te yega Colombia. Nan mester pidi refugio a traves di canciyeria Colombiano.
Te dialuna merdia a reporta 167 desertor di Polis Nacional, Guardia Nacional, Armada (marina) y Ehercito. Loke ta implica cu den 12 ora so e cifra a crece exponencialmente.
Mayoria di nan a drenta via deartamento di Norte de Santander, sigui pa Arauca y La Guajira. Hopi di na incluso a yega cu nan famia pa miedo di represalia, segun Migracion Colombia.
E desertornan ta den desacuerdo cu gobierno di Maduro y a bisa cu nan ta pasa den mesun necesidad cu e pueblo Venezolano. Pero e motibo pa cual nan a dicidi bandona nan pais ta pasobra nan tin miedo cu nan captura nan y condena na pa traidor.
Director di Migracion Colombia, Christian Krüger, a splica na El Tiempo cu ora nan yega na e pais ta haci nan un entrevista pa verifica nan identidad, ta duna nan un salvoconducto pa cinco dia, tempo cu nan tin pa manda prueba di nan situacion, pa despues opta pa refugio politico.
“Lo studia, caso pa caso, ken e persona ta y cual ta e argumento cu e ta duna pa haya refugio,” Krüger a bisa e corant nacional. Migracion Colombia a cera e pasonan entre Venezuela y Colombia di Norte de Santander, te mey anochi di ayera.
“Nos ta haci un yamado pa orden y trankilidad na e momento aki di transicion. Pueblo Venezolano ta reclama libertad di un tirania y nos ta sigui apoya tur accion cu ta conduci na esaki,” Krüger a bisa.
