Sikiera 14 persona a fayece y cinco a keda herida diadomingo pasa, pa motibo cu terenonan a los pa e fuerte yobidanan na e municipio di Rosas, na e departamento di Cauca, fuentenan oficial a informa.
Fuente di Unidad Nacional pa Gestion di Riesgo y Desaster (UNGRD) a afirma cu e terenonan a los y lastra varios vivienda, esaki a sosode na un zona rural cu ta yama Portachuelo, na e via Panamericano, e caretera principal cu ta conecta Colombia cu Ecuador.
Autoridadnan a ricibi un alerta y nan a yega te e luga di emergencia, na e limite di Cauca cu departamento di Nariño, pa atende e tragedia.
Segun e fuente di (UNGRD), e habitantenan a ser alerta caba di e tragedia cu lo por sosode na e zona di ‘vulnerabilidad’ ey, pero nan no a scucha e alerta, pa motibo cu ‘e personanan, facilmente no ta bay di acuerdo pa laga su luga di bida’.
Di otro banda, e gobernador di Cauca, Oscar Campo, a afirma via Twitter cu tin ‘organismo di auxilio y mashin geel pa traha e terenonan cu a los y cu a laga victimanan fatal na e via Panamericano’, y cu hunto cu e Ehercito Colombiano, cu ta yuda cu e ‘labor di rescate y limpiesa na e luga’.
Instituto Nacional di Via (Invias) a detaya e situacion, cu ademas a provoca e ciere completo di e caretera Panamericano na e kilometer 82 di e ruta cu ta uni e poblado di Mojarras cu Popayan, e capital di departamento di Cauca.
E hecho aki a suma pa e suceso cu diasabra pasa na Bogota, unda otro terenonan a los den un bario sur di e ciudad, y a afecta 58 famia, di cual a ser recomenda cu 27 mester evacua y 12 no mester haci uzo di vivienda pa preveni un mayor emergencia.
