‘Colegio toets’ nacionalisa pa admision pa HAVO/VWO

Un grupo grandi di alumno di scolnan basico di Aruba ta participa e siman aki na e Colegio toets, cu ta forma un componente pa admision na ciclo basico di HAVO/VWO.

Ayera y awe e muchanan a y lo tuma e toets na ambos Colegio Arubano como Colegio San Nicolas. Na Colegio Arubano un total di 341 alumno procedente di diferente scol basico por a participa mientras cu pa Colegio San Nicolas e cantidad aki ta 79 alumno.

Importante pa remarca segun ministerio di Enseñansa  ta cu e aña aki ta ‘pa prome biaha cu e Colegio toets a wordo nacionalisa y ta bou di coordinacion y responsabilidad di Examenbureau di Departamento di Enseñansa conhuntamente cu e scolnan secundario’. Esaki ta a base di decision di e minister cu a tuma iniciativa pa adapta e ley cu ta regula admision pa asina crea normanan di admision. Segun e nan a bira ‘mas transparente y husto’.

E prome fase di e cambio cu a tuma luga aña pasa tabata encera un adaptacion y tambe nacionalisacion di e normanan di admision. Unda cu e admision pa HAVO/VWO no ta solamente depende riba e resultado di e toets pero cu ta considera otro componentenan pa asina duna un bista mas amplio y balansa di e capacidadnan y potencial di e alumno, segun e minister.

Un otro cambio di e prome fase tabata cu a nacionalisa e normanan, cu ta significa cu no ta e scolnan di HAVO/VWO so por dicidi y determina esaki pero cu esaki mester wordo formula conhuntamente cu Departamento y Inspeccion di Enseñansa cu aprobacion di minister di Enseñansa.

E di dos fase di e adaptacion a sigui e aña aki cu e nacionalisacion di e Colegio toets. Den pasado ta e propio scol tabata traha e toets y tabata responsabel pa e coreccion y determinacion di clausula cu ta wordo aplica pa genera e resultado. Ningun otro departamento no tabata envolvi cu e parti di desaroyo ni control, algo cu minister Michelle Hooyboer-Winklaar no a considera como e forma ‘mas ideal y transparente’. Desde e aña aki a formalisa un decreto ministerial pa instala un comision bou di supervision di Examenbureau cu ta encarga cu e Colegio toets.

E comision cu a keda instala ta consisti di docentenan di ambos scol di HAVO/VWO cu ta responsabel pa e desaroyo di e toets, como tambe di otro docentenan cu tin como responsabilidad e control di calidad. Compara cu antes awo Examenbureau ta esun responsabel pa ricibi e toets di cada alumno asina cu esaki a tuma luga pa asina percura pa e analisis y pa genera e resultado. Pa e parti aki Examenbureau ta haya asistencia di Centraal Bureau Statistiek (CBS).

E tarea importante di ambos Examenbureau como di CBS ta pa haci un analisis di e toets pa determina e validez di cada parti di e toets. Examenbureau ta finalmente e instancia autorisa pa determina e clausula pa determina e cifra y tambe ta e instancia cu lo produci y comunica e resultadonan na Colegio Arubano y Colegio San Nicolas. Ambos scol na nan turno lo comunica e resultado di e alumnonan na cada scol basico, asina e ministerio ta informa.

Un otro aspecto importante cu a añadi na e proceso di admision y specificamente pa cu e toets ta e posibilidad pa un alumno haci e toets na un otro ocasion den caso di enfermedad.