Awe mainta maestro-, studiante- y boluntarionan, como tambe personal di Santa Rosa y Living Soil Aruba, ta man na obra na Colegio Santa Filomena pa cuminsa planta e hardin di alimentacion como parti di e proyecto agroforesteria sintropico. Colegio Santa Filomena ta e ultimo scol participante den e proyecto di agroforesteria sintropico cu ta ricibi su hardin di alimentacion.
Aña pasa dia 1 di november minister di Transporte, Integridad, Naturalesa y Asunto di Adultonan Mayor, Ursell Arends, a lansa e proyecto aki y na mesun momento a lansa e plataforma cu a duna oportunidad na e scolnan basico pa registra y participa na e proyecto aki. E proyecto di agroforesteria sintropico a ranca sali oficialmente den luna di januari di e aña aki cu e prome scol cu tabata Scol Basico Washington.
Despues di e esaki ariba diferente diasabra desde januari te cu awe trabounan di plantacion a wordo realisa na varios scol full rond Aruba.
E proyecto agroforesteria sintropico ta un proyecto cu tin como meta pa inculca e balor pa agricultura den e futuro generacion pa medio di tecnicanan sostenibel, ademas di incentiva nutricion saludable for di un edad trempan.
E proyecto ta wordo financia pa Ministerio di Naturalesa y e scolnan cu a keda seleccion pa participa ta ricibi sosten tanto for di Santa Rosa Aruba y Living Soil Aruba, como tambe for di Gobierno di Aruba pa desaroya un hardin cu ta provee alimentacion.
Tanto e personal di e scolnan y e boluntarionan ta ricibi training pa asina ta mas informa y prepara pa e tecnica di agroforesteria sintropico pa e mantencion, cuido y pa plantacion di matanan. Alabes lo traha tambe ariba implementacion di esaki den e curriculum escolar.
E idea pa a proyecto aki a bin despues cu den luna di mei di 2022 Living Soil Aruba a realisa un di e prome proyectonan di agroforesteria sintropico na Prinses Amalia School. Esaki a sirbi como e proyecto piloto y despues di su bishita minister Arends a expresa su deseo pa tur e scolnan basico na Aruba tin un hardin di alimentacion.
Cu plantacion di e hardin di alimentacion na Colegio Santa Filomena ta culmina e prome fase di e proyecto di agroforesteria sintropico na scolnan basico pa e aña escolar aki. Mas di 10 scol a participa den e proyecto aki y a ricibi nan hardin di alimentacion, y ya varios di nan ta cosechando nan propio fruta- y berduranan.
Potret: pagina di Facebook Santa Rosa.
