ORANJESTAD – Dialuna mainta den un conferencia di prensa, ministro Rudy Lampe (RED) a splica tocante e situacion di colegio San Nicolas. E scol lo continua cu e trayecto di HAVO den tres aña, manera tabata conoci.
E mandatario a bisa cu e noticia coriendo rond, esta cu lo elimina locual ta trata e trayecto di HAVO, ta falso. E ta splica cu tin un necesidad grandi den nos comunidad pa continua cu e proyecto.
Pa aclaracion den e topico, el a bisa cu locual tabata referi na dje, esunnan cu ta caba MAVO y kier haci e trayecto mas largo den 3 aña, ta haya oportunidad pa haci HAVO, asina nan por haal e diploma. Mester realisa e trayecto aki na Colegio San Nicolas mirando, cu na Colegio Arubano na Playa no ta posibel.
El a laga sa cu el a reuni cu rector y docente di colegio San Nicolas, unda cu nan a indica cu lo carga e proyecto di nan, cu ta exigi esfuerso. “Despues di e maneho nobo cu a bin, cu ta Schooladvies y e Nationale Toets, ta premira cu lo bay tin un record di cantidad di mucha cu lo atende HAVO San Nicolas.”
Nan lo carga cu e responsabilidad pa tur esunnan cu ta cabando nan MAVO y kier sigui nan estudio pa HAVO por haci esaki na augustus, manera e tabata for di 2012. E ministro ta bisa cu esey ta nifica cu e cantidad di studiante lo aumenta.
El a splica cu lo tin espacio pa esunnan cu ta bin acerca, anto ta trahando pa e peticion pa parti e sitio di Ibisa cu no ta wordo uza pa bira e parti di colegio San Nicolas. E trabou lo por tuma luga den vakantie grandi. Te ainda no tin cantidad di studiante cu lo atende, pero el a anuncia cu lo duna cifra.
Durante siman e Toets Nacional a tuma luga y lo mester warda pa resultado pa tin un bista concreto cuanto persona ta bay colegio pariba. Sinembargo, di parti di SMOA, Colegio Arubano a manda un carta cu nan lo tuma 270 studiante maximo. Nan no por carga mas cu esey. Eynan Colegio San Nicolas ta bay carga responsabilidad aki. Di parti gobierno, nan ta spera pa desaroyo aki y cu nan a ‘haya blessing pa carga e reto aki’.
