Mediante un publicacion riba nan Facebook Page, Colegio San Antonio a anuncia cu for di e aña aki nan a adapta reglanan di scol pa loke ta trata uso di telefon pa nan alumnonan caminda nan por haci uso di dje den pauze of den un vrije lesuur.
Uso di telefon na scol ta topico di discusion na scolnan riba nos isla, den region, na Merca, Europa. Cu otro palabra e ta un topico actual cu hopi institucion ta deal cune awendia.
“Nos ta consciente cu e telefon celular ta un distraccion pa nos alumnonan. P’esey desde e aña aki a adapta reglanan di scol caminda cu e alumno ta liber pa usa su telefon den pauze of un vrije lesuur pero durante les ta warda esaki den tas, baki riba mesa of den hoesjes na muraya. E docente ta indica na cua momento e alumno por usa su telefon. Por ehempel, na ora di usa Kahoot. Pero semper cu un meta educacional.
Alumno cu warda telefon den saco di carson of jacket por risca cu ta tuma e telefon den beslag. Y si esaki pasa durante prueba, scol ta considera esaki como un intento di fraude (spiek).
Nos ta den e fase di implementacion y ta compronde cu e ta tuma tempo. Pa hopi alumno e telefon celular a bira manera e di 79 organo importante na su curpa. P’esey docentenan tin hopi pasenshi den e fase aki.
“Nos ta spera cu e cambio den maneho aki duna su fruto. E meta mas importante: e alumno ta mas gefocused den les y por concentra y participa optimalmente. Dependencia di telefon celular no ta conta pa alumno so, pero pa hopi adulto tambe.” Nan a señala.
Uso di telefon ta genera un interesante debate na unda tur opinion ta valido, tur di nan tin e mesun obhetivo “lo miho pa nan alumnonan” for di diferente angulo y vision.
E comunicado a causa cu basta usuarionan di e red social aki a share e post pa asina duna nan apoyo na e iniciativa aki mirando cu di e forma aki e alumnonan por enfoca un poco mas riba nan estudio y docentenan tambe por sigui e mesun ehemplo.
