Diahuebs ultimo Prome Minister Evelyn Wever-Croes hunto cu Minister di Enseñansa Armando Lampe, Directora di Skoa Juffrouw Baly, CIO Varelie Croes y Pancho Croes di FUTURA, a bishita e scol pa asina duna un bon noticia na Colegio Pastoor Kranwinkel. Colegio Pastoor Kranwinkel na Paradera a ricibi e grato noticia cu nan lo bira e di dos e-Learning Project.
Na luna di april aña pasa, den colaboracion cu Minister di Enseñansa, Armando Lampe, Gabinete Wever-Croes a lansa un proyecto piloto innovativo den educacion primario pa stimula e 21Century Skills for di un edad hoben caba. Un proyecto hopi importante na unda cu Scol Basico Cacique Macuarima y Scol preparatorio Aterima a wordo digitalisa.
Cabesante di e scol, señora Angeline Leung a vocifera cu tawata un grato noticia cu nan scol a wordo scogi pa wordo digitalisa y haci asina cu dunamento di les lo ta mas agradabel pa maestronan como tambe pa tur alumno. Señora Leung a gradici Gobierno di Aruba, SKOA y FUTURA pa scoge nan scol pa un proyecto asina grandi y bunita.
Prome Minister a duna di conoce cu mirando e exito di e Proyecto aki, y mirando tambe cu nos ta den Aña di Innovacion y Enseñansa, Gobierno di Aruba lo percura hunto cu docentenan pa digitalisa henter e scol. Poco poco pero sigur nos ta logra nos meta pa digitalisa tur scol na Aruba y pone enseñansa completamente innova. Den Aña di Innovacion y Enseñansa, Gobierno kier dal e pasonan concreto den innovacion y educacion pa modernisa, fortalece y capacita nos como pais pa e retonan actual y di futuro.
