Colegio Nigel Matthew a celebra e fruto di un aña yen di esfuerso y dedicacion di e studiantenan cu a celebra e exito rotundo un aña mas. Cu mas di 40 graduado, a mira e emocion y felicidad di tanto mayornan, familiarnan y docentenan sumamente orguyoso di e hobennan aki.
Mayornan, famianan y amistadnan presente por a disfruta di e gran momento unda a honra y celebra e esfuerso cu cada un di e hobennan aki a haci durante un aña cu seguramente tabata fuerte. Asisti na un scol cu hopi ta considera un poco “leu” siguramente no ta algo facil. Hopi di e studiantenan aki mester lanta sumamente trempan pa por coy bus y yega te scol, pa despues keda warda pa bus atrobe despues cu scol caba. Aun sabiendo e sacrificio cu nan mester haci tur dia, aña tras aña ta mira mas studiante di mas leu ta scoge pa asisti Colegio Nigel Matthew y duna lo miho di nan pa nan por logra tur nan meta.
Tabata un bunita momento pa mira cada studiante ricibi aplauso y elogio pa e dedicacion y trabao cu nan a haci durante henter e aña. Por a mira e orguyo den e cara di tanto mayornan como e docentenan cu dia tras dia a traha sumamente duro pa guia e studiantenan pa sigura cu nan lo logra cada un di nan meta.
Un pabien grandi na tur e studiantenan cu e logro aki y tur clase di exito den e caminda cu ta bini nan dilanti.
