Manera cu ta conoci, Colegio Arubano tin mas cu un aña sin rector anto a bolbe inicia un buskeda pa uno nobo cu lo por bin pa fin di mei. Conrector Anne Cameron ta admiti cu a pesar di algun desafio na inicio di aña escolar, e scol a logra maneha toch basta bon sin un rector pa mas cu un aña.

Hopi pisa na cuminsamento
Na cuminsamento di e aña escolar si tabata tin algun desafio cual sra. Cameron no a detaya pero ta indica cu e tabata hopi pisa. Na luna di october 2016, un ex rector di un scol na Corsou a bini yuda Colegio como afdelingsconrector pa examenklas. Sra. Cameron ta splica nos cu meneer Coster pues ta esun cu a kita e peso aki for di nan cual a duna e chens pa e dedica su tempo completo riba e rectorschap. Manera cu Bon Dia Aruba a informa anteriormente, e comision nombra pa selecciona e rector nobo a wordo reenforsa cu un representante di minister di Enseñansa. Pa fin di mei si tur cos cana segun planificacion, Colegio lo tin un rector nobo manera cu nos a informa tambe.

Renobacion y mal contento
Segun sra. Cameron ta splica nos, cada aña e scol tin contract cu docentenan cu nan mester renoba of caba cu ne. Esaki ta wordo haci den e periodo di februari/maart den cada aña escolar anto ta cuminsa publica e vacaturanan na Aruba, Corsou, Hulanda y riba nan website. “Cada aña tin un cantidad di hende nobo cu ta bay, anto un otro cantidad cu ta bin. Ainda nos ta tratando e proceso ey y dialogando cu hende riba nan oranan. Pa un full-time job, nos a papia cu nan caba pa esunnan cu si y no ta bay door.”

E ta admiti cu no ta tur hende ta contento cu e maneho aki pero ta trata aki di palabracionnan cu ta mara na contract. Oudercommissie Colegio Arubano (Occa) no ta mucho contento con cosnan ta bayendo na e scol. Esaki nan a expresa den un carta cu a bay pa directiva di Stichting Middelbaar Onderwijs Aruba (Smoa) cu e peticion pa contesta pronto. Sra. Cameron ta bisa cu e scol ta den un proceso di mehoracion di nan maneho. “Den e carta di e mayornan ta para algun puntonan y semper como guia di scol, nos ta tene cuenta cu e cosnan cu nan tin di bisa y preguntanan cu nan tin. Claro cu tin puntonan den e carta cu nos ta tene cuenta cu ne anto nos ta haciendo un plan di mehoracion actualmente.” E ta splica cu directiva a yega di sinta cu e comision caba pa trata algun tema manera ‘medezeggenschapsraad’ como tambe pa reglamento di keho. “Asina semper nos ta envolvi y coopera cu tur nos stakeholders den e proceso aki di mehoracion.”

Comunicacion
Un di e puntonan cu e comision ta toca riba dje den nan carta pa Colegio ta cu ta haci falta di comunicacion cu e mayornan, algo cu nan a yega di trece pa dilanti den pasado caba. Conrector Milouschka Wernet ta remarca cu: “Tin hopi mas cosnan positivo pasando na Colegio cu tin negativo. E opinionnan negativo ta porta di un par cu no ta contento pero nos tin cu deal cune. Nos ta habri pa deal cu ne tambe. Nos kier papia y wak kico nos por haci.” Sra. Wernet a menciona cu diaranson anochi mes tabata tin voorlichtingsavond pa mayornan di derde klas cual tabata bon bishita cu hopi bon comentario.

E siman aki tambe tabata tin un encuentro cu mayornan di examenkandidaat cu presencia di 300 mayor. Pues directiva ta conclui cu seguramente tin algun cos pa mehora pero ta enfatisa cu e cosnan positivo tambe cu ta tumando luga actualmente ta yudando e scol pa sigui bay dilanti den union