Den weekend otro scol cu ta participando den e proyecto di agroforesteria sintropico, esta Colegio Conrado Coronel, a cuminsa cu nan hardin di alimentacion. Un grupo di boluntario, mayor, docente, alumno y trahadonan di e organisacionnan encarga cu e proyecto a traha pa asina prepara e tereno necesario pa Conrado Coronel por tin su hardin di alimentacion.
E proyecto di agroforesteria sintropico ta un proyecto unda e scolnan cu ta participa ta ricibi sosten tanto for di Santa Rosa Aruba y Living Soil, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel.
Aña pasa dia 1 di november Gobierno di Aruba a lansa e proyecto aki y a lansa e plataforma cu a duna oportunidad na e scolnan basico pa registra y participa na e proyecto aki. Dia 18 di januari a traves di un conferencia di prensa minister Ursell Arends a anuncia e inicio oficial di e proyecto y e prome scol cu a ricibi e hardin di alimentacion, cual tabata Scol Basico Washington.
Despues di Scol Basico Washington Scol Basico Kudawecha tabata e siguiente scol cu a cuminsa cu su hardin di alimentacion y den fin di siman cu a pasa a toca turno na Colegio Conrado Coronel. Den fin di siman binidero Mon Plaisir Basisschool ta e siguiente scol cu bay cuminsa cu e proyecto aki.
