Diabierna mainta na Renaissance Convention Center, docentenan y directiva di Colegio Arubano a bini hunto pa e di dos dia di reflexion caminda a discuti puntonan di mehoracion pa e scol entre otro manera mas entrenamento pa docente y diferente factornan pa locual ta e desaroyo y mehoracion di e organisacion pa mira con por funciona mas miho manera scol.
Experto den maneho Sr. Roy Mezas di e compania Harmony In Motion, ta splica Bon Dia cu e ta yudando Colegio Arubano cu e proceso manera un facilitado cu ideanan strategico. ”Mi ta haci e trabao aki pa yuda Colegio prepara pa e siguiente aña escolar. Esaki ta e prome biaha cu nos ta haci e den estilo aki y trahando awo realmente den grupo pa planifica con nos ta bay trata cu cierto problemanan na Colegio den un manera mas structural y planifica.” Sr. Mezas ta bisa. E idea di e dos dianan aki tabata pa analisa e forsa y debilidad di e organisacion anto tambe ki oportunidad tin pa mehora cierto cosnan y segun Sr. Mezas cualkier menasa cu por tin cu ta perhudica Colegio Arubano pa desaroya manera mester.
S.W.O.T. Analisis
A haci locual ta conoci manera un S.W.O.T. analisis. E puntonan mas fuerte di e S.W.O.T. Analisis (Strenghts, Weaknesses , Opportunities & Threats) a wordo determina riba e prome dia di reflexion anto riba e siguiente dia a bay bini hunto pa analisa ta kico e prioridadnan ta. ”Cu 100 hende bo ta haya henter un lista di cosnan cu por mehora of cosnan cu no ta bon. Nos ta bay kies por ehempel un top 10 punto cu nos ta bay kies cu nos tin cu traha cune como prioridad anto nos ta bay dicidi con nos ta bay haci e.” Sr. Mezas ta bisa. Sr. Mezas ta agrega cu nan no kier pa esaki keda djis un plan anto keda sin ehecuta nada. ”Pa no keda atrobe cu ideanan cu tin problema anto mester traha riba dje nos ta seguramente bay traha un plan caminda por ehecuta tur e puntonan aki den un manera cu e no ta bay tarda tampoco anto cu lo ta mas organisa pa por produci resultadonan necesario.” Sr. Mezas ta splica.
A resalta debilidad y puntonan fuerte hopi cla
Segun Presidente di Conseho di Supervision Sr. Bart Kool, un di e puntonan fuerte ta cu tur e docentenan ta bon educa y nan tambe kier contribui na mehora e funcionamento di Colegio.
Docente di Spaño Sr. Everick Rincones ta splica Bon Dia cu e dianan di reflexion aki ta yuda pa introduci e aña escolar nobo den un manera nobo di locual nan manera docente ta hopi contento cu esaki ta tuma luga. ”Normalmente nos tin nos reunionnan na scol, e aña aki nos a haci e na Renaissance Convention Center hunto cu tayer di S.W.O.T. Analisis di Sr. Mezas cual ta conoci den mundo di comercio pa e sector priva y como un scol, si kier haci algo pa e organisacion mehora e calidad di servicio e ta bon pa haci un S.W.O.T analisis de bes en cuando.” Sr. Rincones ta splica Bon Dia. Sr. Rincones ta bisa Bon Dia cu diahuebs den e analisis den grupo y despues presentacion di cada grupo a resalta mas cu 80% e mesun puntonan fuerte di e organisacion como tambe casi 90% a resalta cierto debilidad hopi cla tambe den e organisacion. ”Manera un organisacion cu kier keda ”up to date” mi ta kere cu nos mester bay traha e plannan riba termino corto, medio y largo pa por ahusta y mehora loke mester mehora. Claro esunnan cu ta fuerte mester keda fuerte, bo tin cu mehora y mantene nan anto e puntonan di desaroyo bo tin cu sigui mehora. ” Sr. Rincones a bisa. Seguramente e dia a sigui hopi yena cu mas charla y puntonan di discusion entre otro e falta di motivacion na scol, con por mehora comunicacion entre studiante, docente y directiva anto hopi otro punto mas cu Bon Dia ta bay keda na altura di dje mientras cu e aña escolar nobo ta desaroya.
