E noticia cu lo cera Colegio Arubano a bin inesperadamente pa hopi hende. Esaki no tabata diferente pa rectorado. Entretanto, henter e scol ta desinfecta y ta cla pa haci uzo di tur e facilidadnan. Un gran danki ta bay na tur esunnan cu a haci esaki posibel. Acerca, mi kier pone atencion riba e echo cu a ricibi hopi pregunta relacion cu identidad di e docentenan afecta.
Mi ta pidi encarecidamente pa respeta identidad di esunnan infecta, ya cu ta trata di un asunto priva. Ceramento di scol no ta sosode facilmente,a haya hopi pregunta tocante esaki. Den anexo 1 por haya
mas informacion relaciona cu ciere di scol. Tambe e conseho di DVG/JGZ completo. Awor cu scol ta bon limpia y completamente desinfecta, por brinda enseñansa na scol back. Awe, 15 di december, scol ta habri back. Esaki ta nifica cu por sigui brinda les na e mesun manera, teniendo cuenta cu e medidanan di siguridad.
No lo tin les online y tampoco lo stream. Pues, ta necesario pa tur alumno ta na scol pa sigui les. Claro, ta casi vakantie di Pasco, pero e di dos siman di scol despues di vakantie tur alumno tin toets. P’esey e lesnan di e siman aki ta importante. Celebracion di Pasco Diabierna awor, dia 18 di december, lo tene nos celebracion di Pasco. E aña aki esaki ta sosode den klas. Ta spera tur mucha 7.30am na scol. E prome parti di e mainta lo tin actividad riba nivel di scol. Di 9.00 pa 11.00am lo tin actividad cu e
mentor.
Durante e actividad aki tur alumno ta haya un snackbox y un juice. Esaki nan por come y bebe pafor. Despues di 11.00am, e alumnonan por bay cas. Aunke cu e aña aki nos no por celebra hunto cu henter e scol, tog nos ta spera cu e alternativa aki ta uno exitoso. Bendemento di buki Dia 18 di december, di 11.00am pa 2.00pm, despues di e celebracion di Pasco, lo tin benta di buki pa alumno(y docente), den biblioteca di scol. Lo bende buki segunda mano pa 1 – 2 florin. Durante e benta di buki aki por tin solamente 20 persona den biblioteca, pa motibo di e reglanan relaciona cu Covid-19.Colegio Arubano a experencia hopi cos den e aña aki. Coronavirus a pone nos bida boca abou. Scol tambe a pasa den turbulencia y a conoce su climax na momento di cambio di directiva y un cambio den rectorado.
Despues di casi cinco luna como rector, mi por comparti cu mi ta hopi contento cu mi por traha cu un team hopi motiva di docente, personal di sosten y conrector. Rectorado Tim Croes, ta enormemente orguyoso di tur alumno cu a pesar di tur medida, ta bay bon na scol. Mi ta ripara cu scol ta nabegando den awa mas trankilo, pues e enfasis ta atrobe riba dunamento di les y nos alumnonan.
