Pa hopi hoben e temporada di vakantie y aña escolar cu a pasa a marca un cuminsamento nobo den nan bida sea nan a bay studia afo, bay Universidad di Aruba of cuminsa traha algun caminda despues di a gradua for di Colegio Arubano. Pa otro hobennan sinembargo cu no a logra di bay over e aña aki, esaki ta un otro aña caminda nan mester cuminsa di nobo. Bon Dia a combersa cu entre otro conrector di Colegio Arubano Sra. Anna Cameron y algun alumnonan mes pa haya sa si lo tin algun falta di motivacion na scol.
Segun Sra. Cameron ta splica Bon Dia, e no ta na altura cu informacion cu casi mita di e klas di VWO 5 a keda sinta e aña aki anto cu e mester revisa esaki sinembargo e ta consciente si di e puntonan cu Comision di Mayor a trece pa dilanti den un carta cu a wordo publica luna pasa den nos matutino. Den e declaracion aki, Ouders Comissie Colegio Arubano (OCCA) a trece algun punto pa dilanti di cual un di nan tabata ta cu e motivacion di docentenan na scol mester ta mas miho. E carta ta sigui bisa cu un ‘acercamento positivo y constructivo (hasta cu alumnonan ‘dificil’) ta importante’. ”Cada aña bao di ley, nos ta obliga pa discuti inspeccion di AVO, e cantidad di alumnonan cu a bay over di un klas pa otro klas, e cantidad cu a drenta tambe cantidad cu a sali, pues bao di ley nos ta obliga pa presenta esaki na e inspecteur di AVO locual nos seguramente ta bay haci pa revisa e puntonan aki.” Sra. Cameron ta bisa Bon Dia. Ta haci esaki na cuminsamento di tur aña escolar segun Sra. Cameron, por ehempel prome cu 1 september ta obliga pa duna tur e data aki na e inspecteur. Akinan ta discuti e porcentahe cu a bay over di cada klas di e aña coriente.
”Ora cu un Comision di Mayor ta bisa un cos asina, semper nos ta tuma e remarca ey hopi serio pues e ta algo cu nos mester investiga realmente si e ta algo cu ta andando. Si tin docente cu no ta realmente motivando e alumno, nos mester investiga esey y claro cu siguiente biaha cu nos bay sinta cu Comision di Mayor nos ta bay papia cu nan y pidi pa duna nos mas informacion pa asina mira como directiva di scol kico tur nos por haci.” Sra. Cameron ta splica Bon Dia. Segun Sra. Cameron ta bisa Bon Dia, den e transcurso di su trabao na Colegio Arubano claro tin biaha el a haya kehonan cu ta bini for di alumnonan of di mayornan riba cierto docente anto despues di a haci investigacion apropia, reuni cu mayornan, alumnonan y docente pa dialoga a logra di yega na soluciona e problema.
Reaccion di alumno
Bon Dia no a logra haya reaccion for di docente ainda pero si a haya algun reaccion for di algun alumnonan di VWO 5 cu a keda sinta e aña aki. E studiantenan ta conta Bon Dia cu tin poco docente cu mester motiva y acerca nan den un manera mas positivo cu ta haciendo awo paso tin biaha bo ta haya cu tin studiante ta desaroya un bista negativo riba bida y scol anto cu no kier kere den nan mesun talentonan y propio capacidad. E studiantenan ta remarca cu scol ta un di e yabinan cu por yud’e habri e portanan cu e mester pa yega unda e kier den bida y cu esaki ta su motivacion principal. Studiantenan ta opina cu nivel di motivacion mester subi den sentido cu lesnan por bira mas interesante, motiva y guia e studiante ora cu ta ripara cu e ta cay atras.
Motivacion di alumno ta bini for di nan mes y for di mayor
”E ambiente den e lokaalnan mes mi ta haya hopi laf, e lokaalnan ta sushi y ta hole malo anto no tin bentana pues bo ta cera constantemente. E bañonan tambe ta hopi sushi y mayoria di nan no ta traha mes. Locual ta motiva ami pa siña y caba scol ta simplemente e meta cu mi tin . Mi kier tin un diploma y sigui studia afo pa logra algo mas den bida.” alumno Faridi Dorff ta conta Bon Dia. Otro alumno ta conta Bon Dia cu su mayornan no kier pa e gasta su tempo cu algo si e sa cu e no ta bay caba cun’e. Su mayornan ta un di e motibonan principal pakico e ta studia y ta keda motiva pa bay scol aunke cu for di scol mes e no ta ricibi e mesun tipo di motivacion .” E ta varia anto depende riba diferente factornan, e ta depende e docentenan cu bo tin e aña aki tambe riba e pakete cu bo a kies riba e tipo di hendenan cu bo ta socialisa cun’e y riba bo propio motivacion pa logra algo den bida. Pa tur hende e ta diferente, pa mi door cu mi ta malo den Matematica esta “Wiskunde”, pero realmente mi ta gusta e resto di mi vaknan pues cual ta duna mi gana di bay scol tur dia. Mi motivacion pa bay scol t’ey pa mi persigui mi mesun metanan y pa mi haci mi mayornan orguyoso.” alumno Ittalee Brown a splica Bon Dia.
