Ayera Colegio Arubano tabata tin un dia bastante interesante unda a ofrece docentenan cursonan educativo y informativo riba diferente topiconan.
E scol ayera a demostra cu a pesar di ta pasando den algun temponan turbulento cu hopi cambionan, nan por bini hunto y comparti momentonan educativo cu ta den beneficio di e scol y seguramente e alumnonan.
Ayera tabata un dia bastante largo na Colegio Arubano yena cu tayernan desde mainta trempan te cu oranan di atardi. Esaki tabata tayernan basa riba topiconan cu por wordo uza na scol.
Por ehempel tin e conoci ‘Who Moved My Cheese?’ cual a ser facilita door di Roy Mezas y ta basa riba con pa trata cu cambionan laboral y den bida. E tayer di EHBO por ehempel facilita door di Eric Gomez unda a haya cierto splicacion riba kico pa haci ora algo pasa den klas.
“Nos ta kere cu door di haya esey, esaki ta locual por pasa na scol of esaki ta loke ta bay pasa na scol. E ta mas cosnan cu lo por wordo uza pa e organisacion y nos a haci esaki cu e meta ey,” conrector di H4 y V5 sr. Igmar Davelaar ta bisa. Otro tayernan interesante tambe tabata “Teacher’s Care” facilita pa Yacintha Anthony tocante con pa maneha stress y agresion.
Telefon pa Hubentud tambe tabata presente pa un tayer riba discusion di norma y moral. E conrector a subraya tambe cu e cooperacion pa traha cu otro scolnan semper ta habri si al caso otro scolnan lo ta interesa pa traha un sistema asina pa nan mes cual ta aplicabel pa tur scol. Docente Rudolf Kelly ta bisa Bon Dia Aruba cu esaki ta cosnan cu normalmente e scol ta haciendo caba pero cu e tayernan aki ta netamente yuda pone e ‘puntjes op de i’. “Cosnan a wordo structura y mi ta hay’e basta beneficioso cu mi a sigui e curso cortico aki,” e ta comenta.
