Despues di mas cu un aña sin rector y un silencio di e directiva SMOA pa cu e tema aki for di januari, Colegio Arubano ta cuminsa atrobe cu e buskeda pa un rector nobo pa e scol.
E comision nombra pa selecciona e rector nobo a wordo reenforsa cu un empleado di e scol cu no ta maestro (onderwijsondersteunend personeel) y un representante di minister di Enseñansa. Si tur cos cana segun e planificacion, Colegio lo tin un rector nobo pa fin di mei.
No ta un exigencia pa e candidato ta un yiu di tera. Esaki Bart Kool, presidente di e hunta di supervision di SMOA ta laga sa. “Nos a traha hopi duro e ultimo simannan aki. E comision di seleccion a wordo reenforsa y di e manera aki minister por keda na altura di e proceso.” Na 2016 tabata mustra cu Colegio lo a haya un rector nobo. E Hulandes François Claassens lo a cuminsa den e posicion aki entrante 1 di januari 2017. SMOA lo a confirma esaki pero e edad di Claassens -e ta riba 60 aña- lo tabata un problema y minister di Enseñansa a laga sa cu e lo no subsidia e salario pa e candidato aki.
Sinembargo e minister Michelle Hooyboer Winklaar tambe a expresa su malcontento den prensa pa cu e directiva no a logra aparentemente di haya un yiu di tera. Cual e no ta haya cu ta algo imposibel. Despues di tur esaki a sigui casonan den corte den cua hues a dicta na fabor di ministerio di Enseñansa, rumornan di un buskeda nobo y un silencio total di parti di SMOA riba e topico aki.
Entretanto e comision di seleccion a reuni dos biaha caba y a crea un lista di exigencia cu e candidatonan mester cumpli cu ne. Tambe a saca un vacatura. “Esaki nos a manda Arubahuis pa trece atencion pa e vacatura na Hulanda. Den curso di otro siman e lo sali den e corantnan local”, sr. Kool a laga sa. E planificacion ta pa tur carta drenta prome cu dia 25 di maart. Den april lo haci e seleccion y pa fin di april mester tin un lista di candidato pa SMOA papia cu nan, cu e intencion cu pa fin di mei e rector nobo wordo scogi.
“No ta un exigencia cu e candidatonan mester ta yiu di tera”, sr. Kool ta conclui. “Esaki no ta den e exigencianan cu gobierno a pone. Nos a discuti den e comision di seleccion cua ta e criterionan cu e candidato mester cumpli cu ne y den e profiel no ta poni cu e mester ta un yiu di tera.”
